छत्रपती शिवाजी महाराज यांचं पहिलं मंदिर, कुठे उभारण्यात आलं? कधी आहे लोकापर्ण सोहळा? जाणून घ्या

शिवक्रांती प्रतिष्ठानच्या माध्यमातून छत्रपती शिवाजी महाराजांचे पहिले भव्य मंदिर महाराष्ट्रात उभारले गेले आहे. हे मंदिर भिवंडीवाडा रस्त्यावरील मराडे पाड्यात उभारले गेले असून, १७ मार्च रोजी शिवजयंतीच्या दिवशी त्याचे लोकार्पण होणार आहे. मुख्यमंत्री देवेंद्र फडणवीस यांच्या हस्ते आणि उपमुख्यमंत्री एकनाथ शिंदे यांच्या प्रमुख उपस्थितीत मंदिराचे उद्घाटन होईल. या मंदिरात छत्रपती शिवाजी महाराजांची मूर्ती प्रसिद्ध आंतरराष्ट्रीय मूर्तिकार अरुण योगीराज यांनी बनवली आहे, ज्यांनी अयोध्येतील रामलल्लाची मूर्ती घडवली होती. हे मंदिर छत्रपती शिवाजी महाराजांच्या कर्तृत्वाचा आदर्श निर्माण करणार आहे.

छत्रपती शिवाजी महाराजांची सहा फूट उंच मूर्ती अखंड कृष्णशिला पाषाणातून तयार करण्यात आली आहे. मंदिर परिसरात त्यांच्या जीवनावर आधारित इतिहास समाजाला कळावा यासाठी ३६ शिल्पचित्रे साकारण्यात आली आहेत, ज्यात प्रत्येक प्रसंगाची माहिती मराठी, हिंदी आणि इंग्रजी भाषेत दिली आहे. हे मंदिर शिवप्रेमींना एक तीर्थस्थळ म्हणून समर्पित होईल.

मुख्यमंत्री देवेंद्र फडणवीस, उपमुख्यमंत्री एकनाथ शिंदे, अजित पवार, खासदार उदयनराजे भोसले, मंत्री शिवेंद्रराजे भोसले, स्वामी गोविंदगिरी महाराज, काडसिद्धेश्वर महाराज यांच्या उपस्थितीत या मंदिराचे भव्य लोकार्पण सोहळा होणार आहे. सात वर्षांच्या मेहनतीनंतर हे मंदिर पूर्ण झाले असून, संपूर्ण परिसर शिवमय झाला आहे. तालुका आणि जिल्ह्यात या मंदिराची जोरदार चर्चा सुरू आहे.

शिवक्रांती प्रतिष्ठानचे संस्थापक राजूभाऊ चौधरी यांनी सांगितले की, संपूर्ण महाराष्ट्रातून या मंदिराबाबत विचारणा होत आहे. शिवाजी महाराजांच्या योगदानामुळे हिंदू धर्माचे मंदिर सुरक्षित राहिले. ते राजे जेव्हा आदिलशहा आणि निजामशहाच्या आक्रमणांविरोधात उभे ठाकले त्याआधी परिस्थिती वेगळी असती. म्हणूनच, आम्ही हे मंदिर उभारले आहे, जे राजांच्या महत्त्वपूर्ण कार्याची आठवण करून देते.