Maharashtra Van Bhushan Award : धुळ्यातील चैत्राम पवार यांना राज्य शासनाचा पहिला 'महाराष्ट्र वनभुषण पुरस्कार' जाहीर

First Maharashtra Van Bhushan Award For Chaitram Pawar:

धुळ्यातील बारीपाडा येथील चैत्राम पवार यांना महाराष्ट्र वनभुषण पुरस्कार पुरस्कार जाहीर झालाय. वनमंत्री सुधीर मुनगंटीवार यांनी या पुरस्काराची घोषणा केलीय. ओसाड पाड्याचे नंदनवन करणाऱ्या चैत्राम पवार यांच्या कामाचा गौरव वन विभागाकडून करण्यात येणार आहे. या पुरस्काराचे स्वरुप २० लाख रुपये, सन्मानचिन्ह व मानपत्र आहे.(Latest News)

चैत्राम पवार यांना पुरस्कार का मिळाला?

धुळे जिल्ह्यातील साक्री तालुक्यातील दुर्गम असा बारीपाडा हा वनवासीपाडा आहे. या पाड्याची सन १९९२ पूर्वीची परिस्थिती म्हणजे उजाड, ओसाड माळरान ,पिण्यासाठी घोटभर पाणी नाही, अशी होती. पण १९९२ नंतर हे चित्र पार बदललं आहे.

(साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

गावात मोठया उमेदीने आणि दुर्दम्य आशावादाने चैत्राम पवार उभे राहिले. त्यांना गावातल्या आदिवासी मावळ्यांनी साथ दिली. या लोक चळवळीची दखल जगाने घेतली. जगातील ७८ देशांमध्ये चांगले गाव कसे असावे? याविषयी झालेल्या तज्ज्ञांच्या सर्व्हेमध्ये बारीपाडाने द्वितीय क्रमांक पटकावलाय. त्याचबरोबर बारीपाडा प्रकल्पास अत्यंत मानाचा समजला जाणारा IFAD या आंतरराष्ट्रीय संस्थेचा पुरस्कार मिळालेला आहे.

चैत्राम पवार आणि गावकऱ्यांच्या श्रमदानातून दैदिप्यमान बारीपाडा या आदिवासी पाड्याची यशोगाथा आहे. म्हणून चैत्राम पवार यांना महाराष्ट्राचा पहिला वनभुषण पुरस्काराने सन्मानित करण्यात येत आहे.