Eknath Shinde News : एकनाथ शिंदेंकडून काँग्रेसला हादरा; बडा नेता फोडला, राजकीय समीकरण बदलणार

राज्यात स्थानिक स्वराज्य निवडणुकीची रणधुमाळी सुरू झाली आहे. आता राजकीय पक्षांना नगरपालिका निवडणुकाच्या निकालाचे वेध लागले आहेत. नगरपालिका निवडणुकीचा निकाल २१ डिसेंबर रोजी लागणार आहे. तर डिसेंबर महिन्याच्या तिसऱ्या आठवड्यात महापालिका निवडणुका जाहीर होण्याची शक्यता आहे. या निवडणुकीआधीच एकनाथ शिंदेंनी काँग्रेसला मोठा हादरा दिला आहे. शिंदेंनी कोल्हापुरात काँग्रेसचा बडा नेता फोडण्यात यशस्वी झाले आहेत.

एकनाथ शिंदे यांनी आगामी महापालिका निवडणुकीच्या पार्श्वभूमीवर कोल्हापुरातील माजी महापौराला फोडलं आहे. त्यांनी माजी महापौर सई खराडे, त्यांचे पती आणि काँग्रेसचे माजी जिल्हाध्यक्ष अजित खराडे ,शिवतेज अजित खराडे यांना पक्षात प्रवेश दिला आहे. माजी महापौर आणि सामाजिक कार्यकर्ते इंद्रजीत अडगुळे यांनीही शिंदे गटात प्रवेश केला. यावेळी आमदार राजेश क्षीरसागर, कोल्हापुरातील शिवसेना पदाधिकारी आणि शिवसैनिकांची उपस्थिती पाहायला मिळाली.

पालघरमध्येही शिंदेंचा धमाका

ऐन निवडणुकीच्या तोंडावर पालघर जिल्ह्यातील एकनाथ शिंदेंची ताकद वाढली आहे. पालघरमधील वसई, विरार येथील बहुजन विकास आघाडीचे माजी नगरसेवक, माजी नगराध्यक्ष विशाल पाटील, माजी नगरसेवक भूषण पाटील यांनी आज असंख्य कार्यकर्त्यांसह शिवसेना प्रक्षात प्रवेश केला.

अमोल पाटील, विशाल पाटील , तुषार पाटील यांनीही शिवसेनेत प्रवेश केला. यावेळी शिंदेंनी सर्वांचे पक्षात स्वागत करून त्यांना भावी सामाजिक आणि राजकीय वाटचालीसाठी शुभेच्छा दिल्या. यावेळी माजी आमदार आणि शिवसेना पालघर संपर्कप्रमुख रवींद्र फाटक उपस्थित होते.