Maharashtra Local Body Elections: निवडणुका नेमक्या कधी होणार? महायुतीच्या नेत्याने थेट तारखाच सांगितल्या

राज्यात मतचोरीविरोधातील एल्गार सभा मुंबईत पडत असतानाच माजी गृहमंत्री दिलीप वळसे-पाटील यांनी आगामी स्थानिक स्वराज्य संस्थांच्या निवडणुकांबाबत मोठं विधान केलं आहे. मंचर येथे युवक-युवती मेळाव्यात बोलताना त्यांनी नगरपालिका, नगरपंचायत, जिल्हा परिषद, पंचायत समिती आणि महानगरपालिकांच्या निवडणुकांच्या संभाव्य तारखा जाहीर केल्याने राजकीय वर्तुळात खळबळ उडाली आहे.

मी तारीख जाहीर करत नाही, तो अधिकार निवडणूक आयोगाचा आहे,” असं वळसे पाटलांनी सांगितलं. मात्र, आमच्याकडील माहितीनुसार ५ नोव्हेंबरला नगरपालिका आणि नगरपंचायत निवडणुका जाहीर होणार आहेत. तर १५ डिसेंबरला जिल्हा परिषद व पंचायत समिती निवडणुकांसाठी मतदान होईल.

जिल्हा परिषदेच्या निवडणुका सुरू असतानाच महानगरपालिका निवडणुका जाहीर होऊन १५ जानेवारीला मतदान पार पडेल, आणि ३१ जानेवारीपर्यंत सर्व निवडणुका पूर्ण होतील, असा विश्वास वळसे पाटलांनी व्यक्त केला. त्यामुळे वळसे पाटलांनी जाहीर केलेल्या या संभाव्य वेळापत्रकामुळे राज्यातील राजकारण आणखी तापणार का, असा प्रश्न उपस्थित झाला आहे.

वळसे-पाटील यांच्या या विधानानंतर राज्यातील राजकीय वातावरण चांगलेच तापण्याची चिन्हं दिसत आहेत. कारण निवडणूक आयोगाच्या औपचारिक घोषणेपूर्वी अशा प्रकारे संभाव्य वेळापत्रक सांगितल्याने विविध पक्षांकडून यावर प्रतिक्रिया उमटण्याची शक्यता आहे.मागच्या अनेक वर्षांपासून स्थानिक स्वराज्य संस्थांच्या निवडणुका रखडल्याने नगरपालिका, महापालिकावर प्रशासकीय राजवट सुरू आहे.

सुप्रीम कोर्टाने देखील या निवडणुका 31 जानेवारीच्या आत घेण्याचे निर्देश दिले आहेत. एकीकडे निवडणुक आयोगावर विरोधी पक्ष रोज नवनवीन गंभीर आरोप करत पुरावे सादर करत आहे. तर आज दिलीप वळसे पाटील यांनी निवडणूक आयोगाच्या आधीच स्थानिक स्वराज्य निवडणुकांचं वेळापत्रकच जाहीर केल्याने आता अनेकांच्या भुवया उंचवल्या आहेत.