Dhule Accident : देव दर्शनावरून परतताना काळाचा घाला; कार अपघातात एकाचा मृत्यू, चार जण जखमी

चिमठाणे (धुळे) : साक्री तालुक्यातील बळसाणे येथील जैन तीर्थ स्थळावर शिरपूर येथील कुटुंब दर्शनासाठी गेले होते. दर्शन घेऊन परतले असता त्यांच्या कारला अपघात होऊन यात एका जणांचा जागीच मृत्यू झाला. तर चारजण जखमी झाले आहेत. सदर अपघात शिंदखेडा- चिमठाणे रस्त्यावर दरखेडा (ता. शिंदखेडा) फाट्याजवळ घडला. 

शिरपूर (shirpur) येथील पीयूषकुमार हुकूमचंद जैन (वय ५१) यांचा अपघातात मृत्यू झाला आहे. शिरपूर येथील जैन कुटुंब पौर्णिमेनिमित्त बळसाणे येथील जैनांचे तीर्थस्थानावर दर्शनासाठी गेले होते. दर्शन घेतल्यानंतर हे कुटुंब सकाळी साडेसहाच्या सुमारास परत शिरपूरकडे मार्गस्थ झाले होते. त्यांची कार चिमठाणे- शिंदखेडा रस्त्यावर दरखेडा फाट्याजवळ आली असता रस्त्यालगत असलेल्या ८५ गाव पाणी पुरवठा योजनेच्या पाइपलाइनच्या मोठ्या लोखंडी पाइपाला धडकली. (Accident) त्यात चालका शेजारी बसलेले पीयूषकुमार जैन यांच्या डोक्याला मार लागून ते जागीच ठार झाले. 

चारजण जखमी 

या अपघातात त्यांची पत्नी किरण जैन (वय ४९), मुलगा विपुल जैन (वय २५), मुलगी दिव्या जैन (वय २६) व चालक जितेंद्र प्रवीण संकलेचा (वय २६) हे जखमी झाले आहेत. चारही जखमींना लागलीच उपचारासाठी रुग्णालयात दाखल करण्यात आले. अपघाताबाबत रोशन रमेशचंद टाटिया यांनी शिंदखेडा पोलिस ठाण्यात खबर दिल्याने अपघाताची नोंद करण्यात आली. उपनिरीक्षक गुलाब ठाकरे तपास करीत आहेत.