Ganesh Visrajan : विसर्जनाहून परतताना अपघात, रील स्टारचा जागीच मृत्यू; विसर्जनाची 'ती' रील ठरली शेवटची

भूषण अहिरे, साम टीव्ही, प्रतिनिधी

Dhule : धुळे शहरातून एक दु:खद बातमी समोर आली आहे. धुळे शहरातील रील स्टारचा गणरायाचे विसर्जन करून परतत असताना दुर्दैवी अपघातात जागीच मृत्यू झाला आहे. गणपत्ती बाप्पाला विसर्जित करतानाचा रील स्टार शुभम संघवीने बनवलेला रील व्हिडीओ हा त्याच्या आयुष्यातला शेवटचा रील बनला. या घटनेमुळे परिसरात हळहळ व्यक्त केली जात आहे.

मिळालेल्या माहितीनुसार, धुळे शहरातील शुभम संघवी याचा रील स्टार तापी नदी पात्रात गणेश मूर्तीचे विसर्जन करुन परतताना भीषण अपघातात मृत्यू झाला. धुळे शहरालगत असलेल्या मुंबई-आग्रा महामार्गावरील कुंडाणे फाट्यावर मोटारसायकलचा अपघात झाला. या अपघातामध्ये शुभमचा दुर्दैवी मृत्यू झाल्याची माहिती समोर आली आहे.

धुळे शहरातील सर्व मोठ्या गणपती मंडळांमधील गणेश मूर्त्यांचे तापी नदी पात्रात रात्री उशिरापर्यंत विसर्जन करण्यात येत असते. विसर्जनासाठी शुभम संघवी हा तापी नदी पात्राजवळ गेला होता. गणरायाच्या विसर्जनानंतर परत येत असताना मोटारसायकलचा अपघात झाल्याने रील स्टार शुभम संघवीचा जागेवरच मृत्यू झाला.

पुण्यात गणपती विसर्जनावेळी दुर्घटना

पुण्यातील पिंपरी चिंचवडमधील मोहन नगर येथे गणेश विसर्जन मिरवणुकीच्या दरम्यान मोठी दुर्घटना घडली. मिरवणूक यात्रा सुरु असताना विजेचा शॉक लागल्याने प्रवीण राजेंद्र कुटे आणि अमोल सदाशिव चव्हाण गंभीर हे दोन तरुण गंभीररित्या जखमी झाले. दोघांनाही उपचारासाठी रुग्णालयात दाखल करण्यात आले.