पाण्याच्या शोधात आलेला बिबट्या पडला विहिरीत

धुळे : साक्री तालुक्यातील दहिवेल परिसरामध्ये गेल्या कित्येक दिवसांपासून थैमान घालणारा बिबट्या पाण्याच्या शोधामध्ये विहिरीत पडल्याची घटना उघडकीस आली आहे. रात्रीच्या वेळी हा बिबट्या विहिरीत पडला असावा असा अंदाज परिसरातील नागरिकांतर्फे बांधण्यात येत आहे. (dhule news leopard in search of water fell into a well)

गेल्या काही दिवसापासून संपूर्ण परिसरामध्ये शेतकरी या बिबट्याच्या (Leopard) दहशतीखाली वावरत होते. परिसरातील शेतकऱ्यांना (Farmer) बऱ्याच वेळा या बिबट्याचे दर्शन देखील झाले होते. त्यामुळे वन विभागातर्फे या बिबट्याचा बंदोबस्त करण्याची मागणी करण्यात आलेली होती. परंतु वन विभागातर्फे (Forest Department) या संदर्भात कुठल्याही प्रकारे दखल घेतली जात नव्हती अशी खंत परिसरातील नागरिकांनी व्यक्त केली आहे.

बाहेर येण्यासाठी धडपड

विहिरीत पडलेला बिबट्या विहिरीच्या बाहेर येण्यासाठी धडपड करीत असून बाहेर येता येत नसल्यामुळे बिबट्या अधिकच चिडल्याचे बघावयास मिळत आहे. तसेच या बिबट्याला बघण्यासाठी परिसरातील नागरिकांनी देखील मोठ्या प्रमाणात गर्दी केल्याचे दिसून येत आहे.