पोलिसांनी उधळता घरफोडीचा डाव; पाठलाग करत एकास घेतले ताब्‍यात

धुळे : मध्यप्रदेश राज्यातील दरोडेखोर टोळीचा शिरपूर शहरात कॉलनी परिसरात दरोड्याचा डाव होता. हा डाव मध्यरात्री शहर पोलिसांनी उधळून लावत एका संशयिताला पिस्‍तोलसह ताब्यात घेतल्याची कामगिरी शिरपूर शहर पोलिसांनी (Police) केली आहे. (dhule news Burglary plot foiled by police Chasing and taking one)

शहर पोलिस ठाण्याचे (Shirpur Police) गस्ती पथक मध्यरात्री एक वाजेच्या सुमारास शहरात गस्तीवर असताना अरिहंत कॉलनी परिसरात दोन दुचाकींवर प्रवास करणारे पाच जण आढळले. त्यातील होंडा शाईन दुचाकीवर बसलेल्या युवकाच्या हातात लोखंडी टॅमी होती. पोलिसांना संशय आल्याने त्यांनी दुचाकी धारकांना थांबण्याचा इशारा केला. त्यावेळी दोन्ही दुचाकीसह संशयित कळमसरे गावाच्या दिशेने पळाले.

पाठलाग करत पकडले

दरम्यान चोपडा (Chopda) रस्त्यावरील अरुणावती नदीच्या पुलावर पोलिसांनी होंडा शाइन दुचाकी चालवणाऱ्यास पकडले. तर मागे बसलेला संशयित अंधाराचा फायदा घेत नदीपात्राच्या बाजूने पसार झाला. तसेच अन्य तीन संशयित दुचाकीवरून पसार झाले. संशयिताकडून पोलिसांनी गावठी बनावटीचे पिस्तूल, दोन स्क्रूड्रायव्हर, लोखंडी टॅमी, प्लॅस्टिक कॅरिबॅगमध्ये मिरची पूड व दुचाकी असा घरफोडीसाठी आवश्यक साहित्यासह मुद्देमाल जप्त केला असून फरार इतरांचा शोध शिरपूर पोलीस घेत आहे.