Tulja Bhavani Mandir : तुळजाभवानी मंदिराचे होणार नूतनीकरण; पुरातन दगडावर नंबर टाकायला सुरवात, ५८ कोटी १२ लाखाचा निधीस मान्यता

बालाजी सुरवसे 

धाराशिव : श्री तुळजाभवानी देवीच्या मंदिर परिसरातील नुतनीकरणाच्या विविध विकासात्मक कामास पुरातत्व विभागाकडून सुरुवात करण्यात आली आहे. यासाठी एकूण ५८ कोटी १२ लाख रुपयाच्या कामांना प्रशासकीय मान्यता देण्यात आली आहे.

महाराष्ट्राची कुलस्वामिनी असलेल्या (Tulja Bhavani Mandir) तुळजाभवानी मंदिरातील होम कुंड, पालखी कट्टा आणि स्टेडीयमचे काम पहिल्या टप्यात पुर्ण केले जाणार आहे. या अनुषंगाने मंदिरातील जुन्या पुरातन वास्तुतील दगडी कमानीमधील प्राचीन दगडांना नंबर टाकण्याचे काम सुरू करण्यात आले आहे. हे काढलेले दगड पुन्हा त्याच ठिकाणी बसवले जाणार असुन जुन्या घडीव दगडांवर नंबर टाकले जात आहेत. याची सुरवात करण्यात आल्याची माहिती मंदिर विश्वस्तांकडून सांगण्यात आले. 

दोन टप्प्याच्या कामासाठी उद्या बैठक 

विकास आराखड्यातील एकूण तिन टप्यात होणाऱ्या कामाचा पहिला टप्पा सुरु करण्यात आला आहे. यासाठी ५८ कोटी १२ लाख रुपयाच्या कामांना प्रशासकीय मान्यता मिळाली आहे. तसेच पुढील दोन टप्याच्या कामाबाबत उद्या मिटींगमध्ये नियोजन करण्यात येणार असल्याची माहिती मंदिर प्रशासन तसेच मंदिर संस्थानचे विस्वस्त आमदार राणा जगजितसिंह पाटील यांनी दिली.