धाराशिव : 11 दिवसांपासून महसूलचे कामबंद आंदाेलन, शेतक-यांसह विद्यार्थ्यांची कामे खोळंबली

- बालाजी सुरवसे

धाराशिव जिल्ह्यातील गेल्या 11 दिवसांपासून सुरु असलेल्या महसूल कर्मचा-यांच्या काम बंदचा सर्वाधिक फटका शेतक-यांसह विद्यार्थ्यांना बसला आहे. दरम्यान आंदाेलनावर ताेडगा काढावा अन्यथा नागरिकांची काम खाेळंबल्याने अधिकारी, कर्मचाऱ्यांवर कायदेशीर गुन्हा दाखल करुन निलंबित करावे अशी मागणी जनहित शेतकरी संघटनेच्या वतीने करण्यात आली आहे.

बनावट दस्तऐवज प्रकरणी धाराशिवचे तत्कालीन उपविभागीय अधिकारी डॉ. योगेश खरमाटे यांच्यासह तिघांविरुद्ध आनंदनगर पोलिस ठाण्यात गुन्हा दाखल करण्यात आला आहे. ही कारवाई पोलिसांनी नियमबाह्य केल्याचा आरोप करत पोलिसांवर कारवाई करावी या मागणीसाठी महसुल कर्मचाऱ्यांनी गेले 28 मे पासून कामबंद आंदोलन सुरू केले आहे.

दरम्यान या आंदोलनामुळे विद्यार्थी, शेतकरी याचे नुकसान झाल आहे. त्यामुळे गुन्ह्यात फरार असलेले धाराशिवचे तत्कालीन उपविभागीय अधिकारी योगेश खरमाटे यांना तात्काळ अटक करावी. याचबरोबर आचारसंहिता काळापासुन हे आंदोलन केल्याने आचारसंहितेचा भंग झाला असुन त्यामुळे आंदोलनातील अधिकारी कर्मचाऱ्यांवर कायदेशीर गुन्हे दाखल करुन निलंबित करावे अशी मागणी जनहित शेतकरी संघटनेच्या वतीने करण्यात आली आहे.

Edited By : Siddharth Latkar