धक्कादायक! विहिरीत पडलेला बॉल काढताना बुडून चिमुरड्याचा दुर्दैवी मृत्यू

विजय पाटील

सांगली: विहिरीत बुडून एका शाळकरी मुलाचा दुर्दैवी अंत झाला आहे. विहिरीत पडलेले बॉल काढण्यासाठी गेला असता तोल जाऊन पडल्याने ही घटना घडली आहे. मिरज शहरामध्ये हा प्रकार घडला आहे. अफजल पठाण (वय 14) असे मृत मुलाचे नाव आहे. या घटनेने परिसरात हळहळ व्यक्त केली जात आहे.

हे देखील पहा-

मिरज शहरातील इंदिरा नगर शेवकरे मळा येथे अफजल अमजद पठाण या मुलाचा विहिरी मध्ये बुडून दुर्दैवी मृत्यू झाल्याची घटना समोर आली आहे. मृत अफजल हा आपल्या लहान भाऊ आणि मित्रासोबत रस्त्यावर क्रिकेट खेळत होता. यावेळी खेळताना बॉल हा गोपाळ कदम यांच्या विहारीत गेला. त्यामुळे बॉल आणण्यासाठी अफजल गेला असता त्याचा विहिरीत तोल जाऊन पडला.

त्यानंतर घाबरलेल्या लहान भावाने घरी जाऊन याची कल्पना दिली. त्यानंतर आसपासच्या नागरिकांनी विहिरीत दोर टाकून आणि पट्टीचे पोहणाऱ्या तरुणांनी अथक प्रयत्न करून अफजल याचा शोध घेण्याचा प्रयत्न केला. मात्र मृतदेह सापडू शकला नाही. त्यानंतर सुमारे दोन तास अथक प्रयत्न करून आयुष सेवा भावी संस्था आणि मिरज अग्निशमन पथकाने मिळून मृतदेह शोधून बाहेर काढला. या घटनेची नोंद मिरज शहर पोलीस ठाण्यात झाले असून या घटनेमुळे परिसरात हळहळ व्यक्त होत आहे.

Edited By-Sanika Gade