वेताळवाडी किल्ल्यावर टोळक्यांची हुल्लडबाजी, पंचधातूची तोफ कोसळली, एक जण जखमी

छत्रपती संभाजीनगरमधील सोयगाव तालुक्यातील वेताळवाडी किल्ल्यावर तरूणांच्या टोळक्यांनी हुल्लडबाजी केली. या गोंधळादरम्यान किल्ल्यावर असलेली पंचधातूची पुरातन तोफ कोसळली. यात एका तरुणाचा पाय दबला गेला, यात तो जखमी झाला. घटनेत ऐतिहासिक तोफेचेही नुकसान झाले आहे. हा प्रकार गुरुवारी (४ सप्टेंबर) सायंकाळी घडला. या घटनेनंतर पोलिसांनी अज्ञात टोळक्याविरुद्ध गुन्हा दाखल केला आहे.

सोयगाव तालुक्यातील अंबईघाटजवळील डोंगरमाथ्यावर असलेला सुंदर असा वेताळवाडी किल्ला पाहण्यासाठी तरुणांचं टोळकं आलं होतं. सुरुवातीपासूनच तरुणांनी गोंधळ घालत हुल्लडबाजी केली होती. फोटो काढत असताना तोफेजवळ ढकलाढकली झाली आणि पंचधातूची तोफ खाली कोसळली.

यात एका तरुणाचा पाय दबल्याने तो तरुण जखमी झाला. तरी या घटनेत पुरातन तोफेचं नुकसान झालं आहे. घटनेची माहिती मिळताच पुरातत्त्व विभागाचे अधिकारी घटनास्थळी दाखल झाले. पाहणीदरम्यान हा प्रकार हुल्लडबाजीमुळे झाल्याचे स्पष्ट झाले. विभागाने घटनेची गंभीर दखल घेऊन पोलिसांत तक्रार दाखल केली.

घटनेचे गांभीरे लक्षात घेता पोलिसांनी अज्ञात टोळक्याविरुद्ध गुन्हा दाखल केला आहे. सोयगाव पोलीस ठाण्याचे पोलीस उपनिरीक्षक गजानन आरेकर यांच्यासह अजय कोळी,गजानन दांडगे यांनी घटनास्थळी पंचनामा केला आहे या प्रकरणाचा पुढील तपास पोलीस निरीक्षक पंकज बारवाल करीत आहेत.