Sillod Crime News: मित्रांसोबत वाढदिवस साजरा करण्यासाठी गेला; तिथेच घडली भयानक घटना, तरुणाच्या मृत्युने खळबळ

नवनीत तापाडिया, साम टीव्ही

Chhatrapati Sambhaji Nagar Crime News: छत्रपती संभाजीनगर जिल्ह्यातून एक भयानक घटना समोर आली आहे. मित्रांसोबत वाढदिवस साजरा करण्यासाठी गेलेल्या एका २८ वर्षीय तरुणाची चाकून भोसकून हत्या करण्यात आली आहे. सिल्लोड तालुक्यातील वांजोळा गावात ही घटना घडली. या घटनेनं परिसरात मोठी खळबळ उडाली आहे. संतोष जादुसिग बामनावत (वय २८, रा. वांजोळा) असे मृत तरुणाचे नाव आहे. (Latest Marathi News)

मिळालेल्या माहितीनुसार, शुक्रवारी रात्री संतोष बमनावत या तरुणाचा वाढदिवस होता. मित्रांसोबत वाढदिवस साजराकरून एका हॉटेलवर त्यांनी पार्टी केली. यानंतर शनिवारी सकाळी हॉटेल गारवा समोरील पाण्याच्या पाटात त्याचा मृतदेह नागरिकांना दिसून आला. (Breaking Marathi News)

सदरील घटनेची माहिती मिळताच ग्रामीण पोलिस (Police) ठाण्याचे पोलिस निरीक्षक सीताराम मेहेत्रे यांनी पोलिस कर्मचाऱ्यांसह धाव घेतली व मृतदेह सिल्लोड उपजिल्हा रुग्णालयात आणला. खून झाल्याची माहिती मिळताच नातेवाइकांनी रुग्णालयात गर्दी केली.

ग्रामीण पोलिस रात्रीपासूनच्या घटनाक्रमाची माहिती घेत असून संतोष सोबत पार्टीत असलेल्या त्याच्या मित्रांना पोलिसांनी ताब्यात घेतले आहे. घटनास्थळी श्वान पथकालाही पाचारण करण्यात आले असून वेगवेगळ्या दिशेने ग्रामीण पोलिस तपास करीत आहे.

या प्रकरणी ग्रामीण पोलीस ठाण्यात गुन्हा दाखल करण्यात आला आहे. मृत संतोष याच शुक्रवारी (५ एप्रिल) वाढदिवस होता. त्या वाढदिवसानिमित्त तो काही मित्रांसोबत डोंगरगाव फाट्यावर (Chhatrapati Sambhaji Nagar) एका हॉटेलवर जेवणासाठी गेला होता. यादरम्यानच त्याचा घात झाल्याचे सांगण्यात येत आहे.

त्याचा वाढदिवस त्याचा मरण दिवस ठरल्याने या घटनेची सखोल चौकशी करण्याची मागणी संतोष याचा नातेवाईकांनी केली आहे. दरम्यान या खुनाच्या घटनेमुळे सिल्लोड शहरात खळबळ उडाली असून लवकरच या घटनेतील आरोपी गजाआड करण्यात येतील असा विश्वास पोलिसांनी व्यक्त केला आहे.

Edited by - Satish Daud