Sangli News : 'राज्यात कुस्तीचा 'सांगली पॅटर्न' सुरू करु', महाराष्ट्र केसरीतील वादानंतर चंद्रहार पाटलांचं वक्तव्य

Sangli Latest News : कुस्ती क्षेत्रातील लोकांकडून पैलवानांवर अन्याय सुरू आहे आणि महाराष्ट्र केसरी कुस्ती स्पर्धेत पैलवानांच्यावर अन्याय होत आला आहेअसा आरोप डबल महाराष्ट्र केसरी चंद्रहार पाटील यांनी केला आहे.

तसेच महाराष्ट्र केसरी (Maharashtra Kesari) कुस्ती स्पर्धेमध्ये होत, असलेले वाद हे कायमस्वरूपी टाळण्यासाठी सांगलीमध्ये यंदाची "महाराष्ट्र केसरी कुस्ती" स्पर्धा भरवण्याचा आपला मानस असून या स्पर्धेसाठी एक कोटींचे बक्षीस देखील आपली देण्याची तयारी असल्याचे पैलवान चंद्रहार पाटील यांनी जाहीर केला आहे.

महाराष्ट्र केसरीच्या स्पर्धा सांगलीत झाल्या तर त्या विना तक्रार आणि वादा-विना होऊ शकतात. सांगलीत कुस्ती स्पर्धा यशस्वी करून दाखवून देऊ,त्यानंतर कुस्तीचा सांगली (Sangli) पॅटर्न महाराष्ट्रात सुरू होईल, असा विश्वास देखील पैलवान चंद्रहार पाटलांनी व्यक्त केला आहे.

तसेच पैलवानांवर अन्याय झाल्यास तो आत्महत्या पर्यंत जातो आणि मी देखील महराष्ट्र केसरी स्पर्धेत माझ्यावर झालेल्या अन्यायानंतर आत्महत्याच्या निर्णयापर्यंत पोहोचलो होतो. मात्र त्यातून सावरलो आहे. पण ज्या चार माकडांनी माझ्यावर अन्याय केला, त्यांना माझं सांगणं आहे की कोणत्याही पैलवानावर आता अन्याय करू नका, असा इशारा देखील पैलवान चंद्रहार पाटील यांनी दिला आहे. सांगलीमध्ये आयोजित पत्रकार परिषदेमध्ये ते बोलत होते.