Buldhana Accident: गणपती मिरवणुकीत विजेच्या शॉकने तरुणाचा मृत्यू; बुलढाण्यातील काळीज सुन्न करणारी घटना

Buldhana News:

गणेशोत्सवामुळे राज्यात सगळीकडे आनंदी वातावरण पसरलं आहे. घरोघरी गणपती येणार म्हटल्यावर गणेशोत्सवात बेभान होऊन डिजेच्या तालावर तुम्हीही नाचले असाल. उत्साहाच्या भरात काही मुलं डिजेवर चढून हवेत झेंडा फिरकवतात. मात्र असं करणं एका तरणाच्या जीवावर बेतलं आहे. (Latest Marathi News)

गणपती मिरवणूकीत झेंडा फडकवताना अपघातात विजेचा शॉक लागून एका मुलाचा मृत्यू झाला आहे. या घटनेचा व्हिडीओ देखील सोशल मीडियावर व्हायरल झाला आहे. ऐन गणपती उत्सवात ही घटना घडल्याने गावात हळहळ व्यक्त केली जात आहे.

व्हायरल होणारा हा व्हिडीओ ओडीशातील कटक शहरातला आहे. गणपती मिरवणुकीवेळी डिजेवर चढून झेंडा फडकवणाऱ्या एका विद्यार्थ्याचा वीजेचा शॉक लागून जागीच मृत्यू झालाय. तर चार विद्यार्थी गंभीर जखमी झालेत.

मृत्यू झालेला विद्यार्थी बुलढाण्यातील असून सोहम सावळे असं त्याचं नाव आहे. तो कटक शहरात एम.एस.सी.चे शिक्षण घेत होता. सोहमच्या महाविद्यालयातही गणपती बाप्पा बसणार होते. महाविद्यालयात मोठ्या उत्साहात गणरायाचं आगमन होत होतं.

डिजेच्या तालावर गणपतीची वाजत गाजत मिरवणूक ट्रॅक्टरमधून काढल्याचं व्हिडीओत दिसत आहे. याच मिरवणुकीत सोहम ट्रॅक्टरवर उभा राहून उत्साहाच्या भरात झेंडा फिरकवतोय. तो नाचनाताना बेभान झालाय. आजूबाजूला काय घडतंय याचं त्याला जराही भान दिसत नाहीये.

सोहमच्या झेंड्याला एल्युमिनिअमची काठी लागलीये आणि सोहम ट्र्रक्टवरून या काठीला लावलेला झेंडा फिरकवतोय. हीच दांडी ११ केव्हीच्या वीजेच्या तारांना लागली आणि सोहमला विजेचा जोरदार झटका बसला. झटका इतका जोरदार होता की, सोहमसहीत चार ते पाच विद्यार्थी ट्रॅक्टरवरून खाली पडले.

काही क्षणापूर्वीच डिजेच्या तालावर नाचणारा सोहम विजेचा झटका लागून जागीच ठार झाला. आनंदाच्या भरात बेभान होऊन नचणाऱ्या सोहमची एक चूक त्याच्या जीवावर बेतली. सोहमचा हा व्हिडीओ जोरदार व्हायरल होतोय. सणासुदीला आनंद व्यक्त करताना, नाचताना भान ठेवा. बेभान होऊन नाचताना आपण स्वत:च्या डोक्यावर धोक्याची टांगती तलवार घेऊन मिरवतोय का? याचा विचार जरूर करा.