शिवसेना ठाकरे गटाच्या खासदाराच्या घरातच फूट; काकांनी सोडली साथ, नाशिकमध्ये भाजपची ताकद वाढली

स्थानिक स्वराज्य संस्थांच्या निवडणुकांचं बिगूल वाजलंय. नुकतेच नगरपंचायतीच्या तसेच नगरपरिषदेच्या निवडणुकांच्या तारखा जाहीर झाल्या. डिसेंबर महिन्यात मतदान प्रक्रिया पार पडेल. दरम्यान, निवडणुकीसाठी मतदारांना आपली भूमिका पटवून देण्यासाठी महाविकास तसेच महाआघाडीतील नेत्यांकडून प्रयत्न सुरू आहेत. याच पार्श्वभूमीवर पक्षांतरालाही जोमानं वेग आला आहे.

नाशिकमध्ये राजकीय घडामोडींना वेग आला आहे. शिवसेना ठाकरे गटाचे खासदार राजाभाऊ वाजे यांच्या घरातच फूट पडली आहे. वाजे यांच्या सख्ख्या काकांनेच पक्षाची साथ सोडत भाजपची साथ दिली आहे. यामुळे नाशिकमधील राजकीय समीकरणे फिरणार आहेत.

नाशिकच्या सिन्नर नगरपरिषदेच्या आगामी निवडणुकीत मोठा राजकीय उलटफेर घडला आहे. आगामी स्थानिक स्वराज्य संस्थांच्या निवडणुकांच्या पार्श्वभूमीवर शिवसेना ठाकरे गटाला जबर धक्का बसला आहे. शिवसेना ठाकरे गटाचे खासदार राजाभाऊ वाजे यांचे सख्खे काका आणि सिन्नर नगरपरिषदेचे नगराध्यक्ष पदाचे संभाव्य उमेदवार हेमंत वाजे भाजप पक्षात प्रवेश करणार असल्याची माहिती समोर आली आहे.

हेमंत वाजे यांनी यापूर्वी सिन्नर नगराध्यक्ष आणि गटनेता अशी महत्वाची पदे भूषवली आहेत. स्थानिक पातळीवर वाजे यांचा मोठा जनाधार मानला जातो. त्यांच्या प्रवेशासाठी भाजपचे वरिष्ठ नेते गिरीश महाजन यांनी स्वत: पुढाकार घेतलं असल्याचं बोललं जात आहे. पुढाकार घेत त्यांनी मोठी खेळी खेळल्याचे म्हटलं जात आहे.

हेमंत वाजे यांच्या प्रवेशाने शिवसेना ठाकरे गटाबरोबरच अजित पवारांच्या राष्ट्रवादीला देखील मोठा धक्का बसला आहे. सिन्नर नगरपरिशदेच्या थेट नगराध्यक्ष पदासाठी हेमंत वाजे यांच्यासारख्या तुल्यबळ उमेदवार राष्ट्रवादीकडे नसल्याने, राजकीय वर्तुळात घडणाऱ्या घडामोडींचा थेट परिणाम माणिकराव कोकाटे यांच्या राजकीय गणितावरही होण्याची शक्यता जाणकारांनी व्यक्त केली.