Devendra Fadnavis: 'माझी सुपारी दिली...' संजय राऊतांच्या आरोपावर फडणवीसांची टीका, म्हणाले; 'त्यांना प्रसिद्धीची..

सचिन जाधव..

Pune: आपल्याला जीवे मारण्याची सुपारी दिल्याचा आरोप ठाकरे गटाचे नेते संजय राऊत यांनी केला होता. खासदार श्रिकांत शिंदे यांचे थेट नाव घेत राऊतांनी हा मोठा गौप्यस्फोट केला होता, ज्यामुळे राज्याच्या राजकारणात खळबळ माजली आहे.

याबद्दलचे पत्रही त्यांनी गृहमंत्री देवेंद्र फडणवीस यांना पाठवले असून यावर उपमुख्यमंत्री देवेंद्र फडणवीसांनी प्रतिक्रिया दिली आहे. (Devendra Fadnavis)

याबाबत अधिक माहिती अशी की, कॉंग्रेस नेते अशोक चव्हाण यांच्यानंतर संजय राऊत यांनीही जीवे मारण्याचा डाव असल्याचा आरोप केला आहे. यावर बोलताना उपमुख्यमंत्री देवेंद्र फडणवीस यांनी "संजय राऊत यांनी जी तक्रार दिली आहे ती तक्रार सुरक्षेसाठी दिले आहे की, सनसनाटी निर्माण करण्यासाठी आहे त्याची चौकशी केली जाणार," असल्याचे सांगितले आहे.

याबद्दल पुढे बोलताना त्यांनी "सुरक्षा व्यवस्थेचा विषय घेऊन तो राजकारणाशी जोडणं चुकीचे आहे. मात्र संजय राऊत (Sanjay Raut) गेल्या काही दिवसांपासून त्यांना प्रसिद्धीची सवय लागली आहे. त्यामुळे त्यांच्याकडून बिनडोकपणाचे आरोप केले जात आहेत," असा हल्लाबोलही त्यांनी यावेळी केला..

चिंचवडची जागा आम्हीच जिंकू...

राज्यात सध्या चिंचवड आणि कसबा पोट निवडणूकीची रणधुमाळी सुरू आहे. उपमुख्यमंत्री देवेंद्र फडणवीसांसह अनेक भाजपा नेते सध्या पुण्यात तळ ठोकून आहेत. या निवडणूकीबद्दल बोलताना देवेंद्र फडणवीस यांनी "चिंचवड पोट निवडणूकीची जागा आम्ही जिंकू," असा विश्वास व्यक्त केला आहे.

दरम्यान, भाजपाकडून चिंचवडमध्ये दिवंगत आमदार लक्ष्मण जगताप यांच्या पत्नी अश्विनी जगताप यांना उमेदवारी देण्यात आली असून त्यांच्यासमोर महाविकास आघाडी पुरस्कृत राष्ट्रवादीचे नाना काटे यांचे तगडे आव्हान आहे.