Maharashtra Politics: NCP अजित पवार गटाच्या बड्या नेत्याला अटक, राजकीय वर्तुळात खळबळ

Summary -

• राष्ट्रवादी काँग्रेस अजित पवार गटाच्या बड्या नेत्याला अटक

• विनोद देशमुख यांना आर्थिक फसवणूक केल्याप्रकरणी पोलिसांनी केली कारवाई

• व्यवसायिक मनोज वाणी यांना जीवे मारण्याची दिली होती धमकी

• विनोद देशमुख हे अजित पवार यांचे निकटवर्तीय मानले जातात

संजय महाजन, जळगाव

जळगावच्या राजकीय वर्तुळातून मोठी बातमी समोर आली आहे. राष्ट्रवादी अजित पवार गटाच्या बड्या नेत्याला पोलिसांनी अटक केली. अजित पवार गटाचे अर्बन सेलचे राज्यसंघटक विनोद देशमुख यांना आर्थिक फसवणूक केल्याप्रकरणी जळगाव शहर पोलिसांनी अटक केली. व्यावसायिकाला जीवे मारण्याची धमकी दिल्या प्रकरणी ही कारवाई करण्यात आली आहे. राष्ट्रादीच्या नेत्याच्या अटकेमुळे जळगावमध्ये खळबळ उडाली आहे.

मिळालेल्या माहितीनुसार, व्यवसायिक मनोज वाणी यांची आर्थिक फसवणूक केल्याप्रकरणी विनोद देशमुख यांच्याविरोधात जळगाव शहर पोलिस ठाण्यात गुन्हा दाखल करण्यात आला होता. या प्रकरणी विनोद देशमुख यांना शहर पोलिसांनी अटक केली. मनोज वाणी यांच्या रामदास कॉलनीतील कार्यालयावर हल्ला करून दरोडा तसेच जीव मारण्याच्या धमक्या दिल्याप्रकरणी त्यांच्याविरोधात याआधीच करावाई करण्यात आली होती. रामानंदनगर पोलिसांनी या प्रकरणी त्यांना अटक केली होती. त्यांना न्यायालयीन कोठडी सुनवण्यात आली होती.

जळगाव शहर पोलिस ठाण्यात देखील विनोद देशमुख यांच्याविरोधात गुन्हा दाखल करण्यात आला असून आता या प्रकरणी त्यांना शहर पोलिसांनी देखील अटक केली आहे. मनोज वाणी यांना धमकी दिल्याच्या प्रकरणात तब्बल ३ वर्षांनंतर त्यांच्याविरोधात कारवाई करण्यात आली आहे. दरम्यान, मनोज वाणी यांनी काही दिवसांपूर्वी पत्रकार परिषद घेत थेट उपमुख्यमंत्री अजित पवार यांच्यावर गंभीर आरोप केला होता. अजित पवार यांचे निकटवर्तीय असल्यामुळे पोलिस विनोद देशमुखांना अटक करत नाही असा आरोप त्यांनी केला होता. या आरोपानंतर राजकीय वर्तुळात खळबळ उडाली होती. त्यानंतर आता देमुखांना पोलिसांनी अटक केली.