Bhiwandi Fire News : भिवंडीत कपड्याच्या कंपनीला भीषण आग, अग्निशमन दलाच्या गाड्या दाखल

फय्याज शेख

Bhiwandi News : भिवंडी शहरातील अग्नितांडवांच्या घटना सुरूच आहेत. मंगळवारी संध्याकाळी ४ वाजताच्या सुमारास धामणकर नाका अजंठा कंपाउंड या परिसरातील महाकाल डाईंग कंपनीला भीषण आग लागली. कंपनीत कच्च्या कपड्यांवर रंग प्रक्रिया करण्याचं काम होतं. कंपनीत ज्वलनशील पदार्थ असल्याने आग आणखीच भडकली.

अजंठा कंपाऊंड या नागरी वस्तीमध्ये ही महाकाल डाईंग आहे. हा परिसर अत्यंत दाटीवाटीचा असल्याने घटनास्थळी दाखल झालेला अग्निशामक दलाला आग विझवण्यासाठी मोठी अडचण निर्माण झाली होती. आगीत कंपनीमधील यंत्रसामुग्री, कच्चा कपडा, रंग प्रकियेचे रसायन हे जळून खाक झाले आहे. (Latest Marathi News)

आगीच्या धुराचे लोट दुरुनही दिसत होते. घटनास्थळी महानगरपालिकेच्या ३ अग्निशामक दलाच्या गाड्या दाखल झाल्या. आग विझवण्यासाठी शर्थीचे प्रयत्न सुरू आहेत. सुदैवाने या आगीत कोणतीही जीवितहानी झालेली नाही. आगीचे कारणही अजून स्पष्ट झालेले नाही.