Bhiwandi Crime : धडापासून शिर वेगळे करत फेकले खाडीत; महिलेच्या हत्येचा उलगडा, धक्कादायक माहिती आली समोर

फैय्याज शेख 
भिवंडी : शहरातील खाडी लगतच्या ईदगाह झोपडपट्टी जवळील दलदलीत धडा पासून शीर वेगळे असलेल्या महिलेचा मृतदेह आढळून आला होता. याचा तपास करताना महिलेची हत्या झाल्याचा उलगडा झाला असून पोलीस तपासात धक्कादायक माहिती समोर आली आहे. यात पोलिसांनी अवघ्या २४ तासात हत्या झालेल्या महिलेची ओळख पटवून ४८ तासात हत्या करणाऱ्या पतीस अटक केली आहे.

ईदगाह झोपडपट्टी जवळील खाडी लगतच्या दलदलीत ३० ऑगस्टला धडा वेगळे महिलेचे शिर आढळल्याने एकच खळबळ उडाली होती. तर महिलेची ओळख पटवणे व त्यानंतर हत्येचा आरोपी पकडण्याचे मोठे आव्हान भोईवाडा पोलिसांसमोर होते. मात्र पोलिसांनी याचा तपास करत महिलेची ओळख पटविली असून परवीन उर्फ मुस्कान (वय २६) असे हत्या झालेल्या महिलेचे नाव असून या गुन्ह्यात पती तहा इम्तियाज अन्सारी याला अटक केली आहे.

झोपडपट्टीत जाऊन महिलेची पटविली ओळख 
घटनेनंतर भोईवाडा पोलिस ठाण्याचे वरिष्ठ पोलिस निरीक्षक अशोक रत्नपारखी यासह पोलिस निरीक्षक प्रमोद कुंभार व त्यांच्या पोलिस पथकातील पोलिसांनी ईदगाह झोपडपट्टीत माहिती घेण्यास सुरवात केली. त्यामध्ये येथील एक महिला दिसत नसल्याबद्दल माहिती समोर आली. त्यानुसार पोलिसांनी तपास करीत चौकशीस सुरवात केली. त्यामध्ये परवीन उर्फ मुस्कान या महिलेचा मृतदेह असल्याचे स्पष्ट झाले. त्यानंतर माहिती घेतली असता तिचा पती घरी नसल्याचे आढळून आले.

संशयातून पती- पत्नीत वाद 

पोलिसांनी शोध घेत १ सप्टेंबरला त्याला ताब्यात घेऊन चौकशी केली. त्यानंतर पती तहा याने पत्नीच्या हत्येची कबुली दिली आहे. दरम्यान पती- पत्नीमध्ये एकमेकांच्या वैयक्तिक संशयावरून वाद होत असत. त्यामुळे त्यांच्यात हाणामारी सुद्धा होत असे. त्यातून परवीन ही २८ ऑगस्टला घरातून निघून गेली होती. त्यातून वाद झाला होता. त्या रागातून पती तहा इम्तियाज अन्सारी याने २९ ऑगस्टला पत्नी परवीन हिची क्रूरपणे हत्या केल्याची माहिती समोर आली आहे.

खाडीत फेकले महिलेचे धड 

हत्या केल्यानंतर पत्नीचे शिर धडापासून वेगळे करीत शरीराचे दोन तुकडे करीत ते खाडीत भरतीचे पाणी वाढले असताना त्यात फेकून पुरावा नष्ट करण्याचा प्रयत्न केला होता. मात्र पोलिसांनी घटनास्थळी नेऊन हत्या केलेल्या पत्नीचे धड कोठे आहे? त्याबाबत शोध घेण्यासाठी खाडी पात्रात बोटीच्या सहाय्याने शोध घेण्याचा प्रयत्न केला. तसेच फॉरेन्सिक पथक व श्वान पथकास पाचारण करून शोध घेण्याचा प्रयत्न केला. पण अजूनही धड आढळून न आलेले नाही.