Beed: अभ्यासाला अन् दिसायलाही सेम टू सेम, बीडच्या जुळ्या बहि‍णींना दहावीत मिळाले जुळे गुण

दहावीचा निकाल लागला. यंदा राज्याचा निकाल ९४ टक्के लागला. अनेक मुलांना घवघवीत यश मिळाले. पण या सगळ्यात बीडच्या जुळ्या बहिणींची सर्वाधिक चर्चा होत आहे. बीडच्या आष्टी शहरातील जुळ्या बहिणींनी दहावीच्या परीक्षेत अगदी 'जुळवून घेतल्यासारखे' यश मिळवले आहे. दोघींनीही समान गुण, म्हणजेच ९६ टक्के गुण मिळवले असून, त्यामुळे त्यांची चर्चा संपूर्ण परिसरात रंगली आहे.

धीरज देशपांडे यांच्या या जुळ्या मुली दत्त मंदिर परिसरात राहतात. अनुष्का आणि तनुष्का असे जुळ्या बहिणींचे नाव. यंदा त्यांचं दहावीचं वर्ष होतं. दहावीत दोघांनाही ९६ टक्के मिळाले. अभ्यासाव्यतिरिक्त जुळ्या बहिणींना नृत्याची आवड आहे. अभ्यासात सातत्य आणि शाळेच्या उपक्रमांत सहभाग असल्याने त्या शाळेतील गुणी विद्यार्थिनी म्हणून ओळखल्या जात होत्या.

विशेष म्हणजे, त्या दोघी सतत एकत्र अभ्यास करायच्या, एकमेकींच्या शंकांचे निरसन करायच्या आणि शाळेच्याही सर्व प्रवासात सोबत असायच्या. निकाल जाहीर झाल्यावर त्यांचा आनंद गगनात मावेना. 'एकसारखे गुण मिळतील असं वाटलं नव्हतं, पण खूप आनंद झालाय,' असं अनुष्काने सांगितलं.

त्यांच्या या यशानंतर देशपांडे कुटुंबीयांनी दोघींनाही औक्षण करून त्यांच्या यशाचा आनंद साजरा केला. या 'जुळ्या यशाची' बातमी सध्या गावात कौतुकाचा आणि प्रेरणादायी विषय बनली आहे.