Shirur News : शेतकरी दाम्पत्याची दोन एकर शेती सातबारावरून गायब; तलाठी व मंडळ अधिकाऱ्याचा प्रताप

योगेश काशीद 

बीड : शासकीय कागदपत्रांमध्ये काय कारनामा होईल सांगता येणे कठीण आहे. अधिकारी परस्पर फेरफार करत असल्याचे पाहण्यास मिळत असते. त्यानुसार शिरूर तालुक्यातील कमळेश्वर धानोरा येथील एका वयोवृद्ध शेतकऱ्याची दोन एकर नऊ गुंठे जमीन सातबारा वरून गायब करण्यात आल्याचा महाप्रताप तलाठी, मंडळ अधिकाऱ्याने केला आहे. या प्रकारामुळे शेतकरी दाम्पत्य संतप्त झाले आहे. 

बीडच्या शिरूर तालुक्यातील कमळेश्वर धानोरा येथील गट क्रमांक २४ मधील सुभद्रा दिनकर जोगदंड या वृद्ध आजीची वडीलोपार्जित दोन एकर नऊ गुंठे जमीन आहे. मात्र हि जमीन सातबारा वरून चक्क गायब झाली आहे. गेल्या दोन पिढ्यापासून ही जमीन त्यांचे नातेवाईक व त्यांच्या नावे होती. असे असताना जोगदंड या वृद्ध दाम्पत्याची जमीन गायब झाल्याने शेतकऱ्यांना नाहक त्रास सहन करावा लागत आहे. 

आर्थिक देवाण घेवाण केल्याचा आरोप 

दरम्यान दोन पिढ्यापासून जमीन नावावर असताना मंडळ अधिकारी, तलाठी व तहसीलदार यांनी गावातील लोकांनी आर्थिक देवाण घेवाण करून ही जमीन चक्क सातबाऱ्या वरून कमी केली आहे. दोनही वयवृद्ध शेतकरी हे भोळसर असून त्यांच्या भोळसरपणाचा फायदा या मंडळाधिकारी, तलाठी आणि तहसीलदारांनी घेतल्याचा आरोप संबंधित शेतकऱ्यांनी केला आहे. अर्थात हा प्रकार नेमका काय आहे? हे समोर येईल.  

आत्मदहनाचा दिला इशारा 

सातबारा वरून जमीन गायब झाल्याने शेतकरी दाम्पत्य तलाठी कार्यालयात हेलपाटे मारत आहे. तर माझी जमीन मला तात्काळ वापस करा; अन्यथा मी आत्महत्या करील आणि माझे जीवन संपवेल असा इशारा या शेतकऱ्यांनी दिला आहे. मला न्याय मिळाला पाहिजे अशी मागणी दिनकर जोगदंड व सुभद्रा जोगदंड यांनी बोलताना केली आहे.