Beed News : गाढवाची तस्करी करणारी आंध्र प्रदेशमधील टोळी ताब्यात; १४ गाढवांची केली सुटका

बीड : गाढवांची तस्करी करणारी आंध्र प्रदेशमधील टोळी माजलगाव पोलिसांनी गजाआड केली आहे. पोलिसांनी ताब्यात घेतलेल्या या टोळीकडून १४ गाढवांची सुटका करण्यात आली असून आता ताब्यात घेतलेल्या सहा आरोपींकडे चौकशी सुरू आहे. 

गाढवांची चोरी करून त्याची तस्करी केली जात असल्याची माहिती (Majalgaon) माजलगाव पोलिसांना रात्री मिळाली होती. त्यानुसार माजलगाव शहरातील धारूर रोडवर संशयित टेम्पोला पोलिसांनी थांबविण्याचा प्रयत्न केला. मात्र तो टेम्पो चालक सुसाट वेगात निघून गेला. यानंतर या टेम्पोचा पाठलाग करत माजलगाव पोलीस सेलू तालुक्यातील (Beed) चाट बोरगाव इथपर्यंत गेले आणि त्या ठिकाणी हा टेम्पो पकडण्यात पोलिसांना यश आले. 

सदर टेम्पोची तपासणी केली असता यात १४ गाढव आढळून आले. या सर्व गाढवांची सुटका करण्यात आली असून ६ जणांना पोलिसांनी ताब्यात घेतले आहे. दरम्यान त्यांच्याकडून याबाबतची अधिक माहिती घेतली जात असून ते गाढव कोठून चोरी केले होते? तसेच कोठे घेऊन जात होते? याबाबतची माहिती पोलीस तपासात समोर येऊ शकणार आहे.