Beed Accident : चहा पिऊन परतताना काळाची झडप, भरधाव वाहनाची स्कूटीला धडक; नामांकित डॉक्टरसह एकाचा मृत्यू

बीड : माजलगाव - गेवराई महामार्गावर असलेल्या व्यंकटेश मंगल कार्यालयाजवळ चहा पिऊन माजलगावकडे येत असलेल्या स्कूटीला पाठीमागून अज्ञात वाहनाने दिलेल्या जोराच्या धडकेत दोघांचा मृत्यू झाल्याची घटना घडली आहे. शहरातील मस्के हॉस्पिटलमध्ये कार्यरत असलेले डॉ. शरद नवनाथ चव्हाण (रा. जायकोवाडी तांडा) आणि स्वरूप मस्के हे दोघे रात्री गेवराई रोडवर चहा पिण्यासाठी गेले होते. चहा पिऊन परत येत असताना व्यंकटेश मंगल कार्यालयाजवळ पाठीमागून एका अज्ञात वाहनाने धडक दिली.

या अपघातात स्वरूप मस्के हे जागीच ठार झाले तर डॉ. शरद चव्हाण हे उपचारासाठी घेऊन जात असताना त्यांचाही मृत्यू झाल्याची हदयद्रावक घटना घडली आहे. सदरील अपघात इतका भयानक होता की, धडक दिलेली स्कूटी १५० ते २०० फूट उडून रस्त्याच्या बाजूला फरफटत नेलेली दिसत आहे. डॉ. शरद चव्हाण यांच्या पश्चात पत्नी, एक मुलगा, एक मुलगी असा परिवार. या अपघाताने सर्वत्र हळहळ व्यक्त होत आहे. या अपघात प्रकरणी रात्री उशिरापर्यंत गुन्हा दाखल करण्यात आला आहे.