Ayodhya Temple : "हमारी साथ दे, मुंह खोल पैसा चाहिये" अयोध्येतील श्रीराम मंदिरावर हल्ल्याचा कट, बीडच्या तरुणाला पाकिस्तानातून धमकीचा मेसेज

बीड जिल्ह्यातील शिरूर कासार तालुक्यातील एका तरुणाला सोशल मीडियावरून एक धक्कादायक मेसेज मिळाल्यानं खळबळ उडाली आहे. पाकिस्तानच्या कराची येथील असल्याचा दावा करणाऱ्या एका संशयित युजरने अयोध्येतील श्रीराम मंदिर आरडीएक्सने उडवण्याच्या कटात सहभागी होण्याचे आमिष या तरुणाला दाखवले आहे. या प्रकरणी शिरूर पोलीस ठाण्यात गंभीर स्वरूपाचा गुन्हा दाखल करण्यात आला आहे.

या संदर्भात तरुणाला पाठवण्यात आलेल्या मेसेजमध्ये स्पष्ट शब्दांत मंदिरावर हल्ल्याची योजना आखल्याचे नमूद करण्यात आले आहे. "हमारी साथ दे, मुंह खोल पैसा चाहिये. अयोध्या का मंदिर आरडीएक्स से उड़ाना है" असा मजकूर असलेल्या व्हॉइस मेसेजमध्ये संशयित व्यक्तीने या कटात ५० जणांची आवश्यकता असल्याचे सांगितले आहे. प्रत्येकास १ लाख रुपये देण्याची ऑफर दिली असून, आरडीएक्स पोहोचवले जाईल असेही सांगण्यात आले आहे.

विशेष म्हणजे, संशयिताने स्वतःचे कराचीमधील लोकेशन स्क्रीनशॉटच्या स्वरूपात पाठवून आपली ओळख खऱ्या पाकिस्तानी नागरिक म्हणून सिद्ध करण्याचा प्रयत्न केला. या संवादात जर संबधित तरुणाला ही योजना मंजूर नसेल तर त्याने दुसऱ्या व्यक्तीचा नंबर द्यावा, अशी सूचनाही करण्यात आली आहे. पोलिसांनी दिलेल्या माहितीनुसार, संबंधित युजर खरोखर पाकिस्तानचा आहे का, याचा तपास सुरू आहे. सायबर तज्ज्ञांच्या मदतीने IP अ‍ॅड्रेस आणि लोकेशन ट्रेस करण्याचे काम सुरू असून, राष्ट्रीय तपास यंत्रणेला यासंदर्भात माहिती देण्यात आली आहे.

संपूर्ण देशात सध्या उच्च सुरक्षा यंत्रणा सतर्क असतानाच असा प्रकार समोर येणं चिंतेची बाब आहे. धार्मिकस्थळाच्या सुरक्षेबाबत यामुळे पुन्हा एकदा प्रश्न उपस्थित झाले आहेत. या घटनेची सखोल चौकशी करण्यात येत असून, या कटाचा सूत्रधार आणि त्यामागील यंत्रणा लवकरच उघडकीस येईल असे पोलीस अधिकाऱ्यांनी म्हटले आहे. तरुणाने योग्य वेळी पोलिसांपर्यंत पोहचवलेली माहिती हा तपासातील महत्त्वाचा दुवा ठरतो आहे.