Badlapur news : बदलापूर नगरपालिकेत आला अनोळखी पाहुणा; कर्मचाऱ्यांची उडाली दाणादाण , नेमक काय घडलं?

कुळगाव-बदलापूर नगरपालिकेची मुख्य प्रशासकीय इमारत बदलापूर पूर्वेकडील वर्दळीच्या स्टेशन परिसरात आहे. नेहमी गजबजलेल्या या परिसरातील पालिकेच्या तिसऱ्या मजल्यावर दुपारच्या सुमारास अचानक एक माकड दिसून आले. हे माकड समोर येणाऱ्या लोकांच्या अंगावर धावून जाण्याचा प्रयत्न करत असल्याने परिसरात पळापळ आणि भीतीचे वातावरण पसरले.

तिसऱ्या मजल्यावर काही वेळ मुक्तसंचार केल्यानंतर हे माकड जिन्याने चौथ्या मजल्यावर गेले. आणि तिथून जवळच्या झाडांवर उड्या मारत ते बाहेर पळून गेले. माकड निघून गेल्यानंतर कर्मचारी आणि नागरिकांनी सुटकेचा श्वास घेतला.

शहरी भागात माकडांची वाढती दहशत

बदलापूरपासून 5 ते 7 किलोमीटर अंतरावर असलेल्या भोज आणि कोंडेश्वरच्या जंगल परिसरात माकडांचा वावर मोठ्या प्रमाणात आढळतो. मात्र, आता ही माकडे अन्नाच्या शोधात थेट शहरी भागात आणि वर्दळीच्या ठिकाणांवर येऊ लागल्याने नागरिकांमध्ये चिंतेचे व दहशतीचे वातावरण पसरले आहे.