Aurangabad Rain |कन्नड तालुक्यात मुसळधार पावासाने उडवली दैना; अनेक गावांचा संपर्क तुटला

Aurangabad Rain News : औरंगाबाद (Auranagabad) जिल्ह्यातील कन्नड तालुक्यातल्या पिशोर परिसरात मुसळधार पाऊस झाल्याने नदी नाल्यांना पूर आला आहे. यामुळे या परिसरातील आठ ते नऊ गावांचा संपर्क तुटला आहे. यामुळे या गावातील गावकऱ्यांची दळणवळण व्यवस्था बंद पडली आहे. सोबतच पिशोर येथील अंजना पळशी प्रकल्प ओव्हर फ्लो झाला आहे.

रात्रीच्या सुमारास कन्नड तालुक्यातील पिशोर भागात अंजना पळशी धरणाच्या पाणलोट क्षेत्रात जोरदार पाऊस कोसळला. त्यामुळे परिसरातील अंजना, खडकी, इसम, कवडा नाला, कोळंबी, काटशेवरी इत्यादी नद्या व नाले दुथडी भरून वाहू लागले आहे. यामुळे कोळंबी, तांडा-भारंबा, भारंबा वाडी, माळेगाव ठोकळ, माळेगाव लोखंडी, जैतखेडा, साळेगाव, भिलदरी यासह अनेक गावांचा पिशोर या मुख्य बाजारपेठेशी संपर्क तुटला आहे. त्यामुळे शेतात गुरांना चारा पाणी करण्यासाठी व दुग्धव्यवसाय करणाऱ्या शेतकऱ्यांना दूध काढण्यासाठी पूर ओसरण्याची वाट बघत थांबावे लागते.

थोडाफार पूर ओसरल्यानंतर या शेतकऱ्यांना नदीच्या दोन्ही काठांना दोर बांधून पाण्यातून जीवघेणा प्रवास करावा लागत आहे. रविवारी संध्याकाळी तसेच रात्री अंजना पळशी मध्यम प्रकल्पाच्या पाणलोट क्षेत्रात जवळपास 93 मिमी पाऊस झाल्याने नद्यांना अचानक पूर आले. यामुळे करंजखेडा, नागपूर या गावांचा साखरवेल, पिशोर या गावांशी संपर्क तुटला होता. अनेक पूल या पाण्यात खचले असून त्यावरून अवजड वाहने जाणे बंद करावे लागणार आहे.

अतिपावसाचा पिकांना फटका

पिशोर भागात झालेल्या ढगफुटी सदृश पावसामुळे नदी नाले ओसंडून वाहत आहे. तर अनेक भागात शेतात पाणी तुंबले आहे. त्यामुळे शेतकरी संकटात सापडला आहे. आधीच पावसामुळे पिकं पिवळी पडत असतांना आता रविवारी झालेल्या ढगफुटी सदृश पावसामुळे आता पिकं वाचण्याची शक्यता खूपच कमी आहे. त्यामुळे शेतकऱ्यांना मोठ्या नुकसानीचा सामना करावा लागणार आहे. तर रविवारी पावसामुळे झालेल्या नुकसानीचे पंचनामे करण्याची मागणी शेतकऱ्यांकडून करण्यात येत आहे.