Andhra Pradesh Accident: अनियंत्रित बसने तिघांना चिरडलं; आंध्र प्रदेशातील थरारक अपघाताचे CCTV फुटेज आले समोर

Andhra Pradesh News:

आंध्र प्रदेशमध्ये अपघाताची एक थरारक घटना घडली आहे. विजयवाडा येथे बसवरील चालकाचे नियंत्रण सुटल्याने बस थेट बसस्थानकातील वेटींग एरीयामध्ये शिरली. यामध्ये बसने तिघांना चिरडल्याने त्यांचा जागीच मृत्यू झालाय. ('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

मिळालेल्या अधिक माहितीनुसार, विजयवाडा येथील पंडित नेहरू या बस स्थानकात ही घटना घडलीये. अपघाताचा थरार बसस्थानकात असलेल्या सीसीटीव्ही कॅमेऱ्यातही कैद झालाय. व्हिडीओमध्ये तुम्ही पाहू शकता की, बस पार्किंग लॉटमध्ये उभी आहे. येथे असताना वाहन चालक बसमागे घेत असतो मात्र त्याचं नियंत्रण सुटतं आणि बस पुढे चालू लागते.

बस स्थानकात असं काही घडेल याची कुणाला काहीच कल्पना नसते. वेटींगसाठी काही माणसं येथे असलेल्या बाकांवर बसलेली असतात. ही बस थेट त्यांना धडकते. या धडकेत तीन जण चाकाखाली चिरडले जातात. हा अपघात इतका क्षणात होतो की, काय करावं? कुणाला कसं वाचवावं याबद्दल कुणालाच काहीच समजत नाही.

मृत्यू कधी आणि कसा ओढावेल याचा काही नेम नसतो. झालेल्या अपघातानंतर आंध्र प्रदेशचे मुख्यमंत्री वायएस जगन मोहन रेड्डी यांनी मृतांच्या नातेवाईकांना १० लाख रुपयांची मदत जाहीर केली आहे. तसेच जखमींवर चांगले वैद्यकीय उपचार देण्याचे आश्वासन देण्यात आले आहे.