Maharashtra Politics : बाळासाहेबांशेजारी दिघेंचा फोटो; शिंदे-ठाकरे सेनेत जुंपली, VIDEO

धर्मवीर सिनेमानंतर आता पुन्हा एकदा राजकीय वर्तुळात आनंद दिघेंवरुन चर्चा सुरु झाली आहे. त्याला कारण ठरलंय पंतप्रधान नरेंद्र मोदींच्या वाढदिवसानिमित्त असलेली शिंदे सेनेची जाहिरात..... बाळासाहेब ठाकरेंच्या शेजारी आनंद दिघेंचा फोटो या जाहीरातीमध्ये लावण्यात आला. हीच बाब ठाकरे सेनेला खटकली. आनंद दिघे नेते, उपनेते नव्हते, ते फक्त जिल्हाप्रमुख होते.त्यांचा फोटो तुम्ही बाळासाहेबांच्या बरोबरीने का लावता? असा सवाल संजय राऊतांनी केला.

बाळासाहेबांचं महत्त्व कमी करण्यासाठी शिंदेंचा कट असल्याचा आरोपही त्यांनी केलाय. त्याला शिंदे सेनेनेही प्रत्युत्तर दिलंय. दिघेसाहेब खोट्या वृत्तीच्या लोकांना कळणार नाहीत, असा पलटवार उपमुख्यमंत्री एकनाथ शिंदेंनी केलाय.

आनंद दिघे शिंदेंचं प्रेरणास्थान

शिवसेनेतून बाहेर पडल्यानंतर एकनाथ शिंदेंनी आनंद दिघेंचं महत्व आणखी वाढवलं असं चित्र आहे. 13 मे 2022 रोजी आनंद दिघे यांच्यावर 'धर्मवीर' नावाचा सिनेमा शिंदेंनी काढला. या सिनेमा पाहण्यासाठी उद्धव ठाकरे ठाण्यात आले होते. मात्र त्यांनी सिनेमाचा शेवट पाहिला नाही, अशी चर्चा होती. उपमुख्यमंत्री एकनाथ शिंदेंनी एका वृत्तपत्रात पंतप्रधान मोदींचं अभिष्टचिंतन करणारा लेख लिहिला आहे. त्यातही त्यांनी हिंदुहृदयसम्राट बाळासाहेब ठाकरे, आनंद दिघे आणि नरेंद्र मोदींचं कार्य आपल्यासाठी प्रेरणादायी असतं असं म्हटलंय.

2001 साली गणेशोत्सवादरम्यान दिघेंच्या कारला अपघात झाला. ठाण्यातल्या एका रुग्णालयात उपचारा दरम्यान त्यांचा मृत्यू झाला. मात्र दोन दशकानंतरही दिघेंच्या मृत्यूबद्दल अनेकदा चर्चा होत असते. आनंद दिघेंना मारण्यात आल्याचं विधान शिंदे गटाचे मंत्री संजय शिरसाट यांनी केलं होतं. इतकंच नाही तर दिघे यांना मारणारे शिवसेना पक्षातील नेते असल्याचा गंभीर आरोप शिरसाट यांनी केला होता.

तळागाळातील माणसांसाठी काम करणारे, सामान्यांच्या हाकेला धावणारे आणि धर्मवीर अशी उपाधी मिळालेले दिघे लोकप्रिय होते. मात्र कालांतराने शिवसेनाप्रमुख बाळासाहेब ठाकरे आणि दिघेंमध्ये दरी निर्माण झाली होती, अशी चर्चा तत्कालीन राजकारणात होती. आगामी पालिका निवडणुकीच्या निमित्ताने दिघेंच्या फोटोचा मुद्दा आणखी तापणार, अशी चिन्हे आहेत.