Chikhaldara Temperature : चिखलदराचे तापमान ३९ अंशावर; तापमान वाढल्याने विदर्भातील थंड हवेचे ठिकाण पडलं ओस

अमर घटारे 
अमरावती : तापमानाचा पारा यंदा अधिक प्रमाणात तापत असून जणू काही सूर्य आह ओकत असल्याचा अनुभव येत आहे. (Amravati) राज्यातील सर्वच शहरातील तापमान ४० अंशाच्या जवळ पोहचले असून विदर्भाचे नंदनवन समजल्या जाणार्या व थंड हवेचे ठिकाण म्हणून ओळखले जाणारे चिखलदरा पर्यटन स्थळ देखील तापमान वाढीमुळे पूर्णपणे ओस पडलं आहे.  

राज्यातील बहुतांश शहरातील (Temperature) तापमान हे ४० अंशाच्या जवळपास पोहचले आहे. तर काही ठिकाणी तर पारा ४२ अंशाच्या वर गेला आहे. यामुळे बाहेर पडणे देखील आता कठीण झाले आहे. यात विदर्भातील थंड हवेचे ठिकाण समजल्या जाणाऱ्या चिखलदरा येथील तापमान देखील ३८ ते ३९ डिग्रीवर गेला आहे. त्यामुळे या ठिकाणी पर्यटकांनी पाठ फिरवली आहे. तर पर्यटकांअभावी (Chikhaldara) चिखलदरामध्ये शुकशुकाट बघायला मिळतो आहे. 

अमरावतीचे तापमान ४३ अंशावर 

तसेच अमरावती शहरात आज पारा ४३ डिग्रीवर गेला आहे. त्यामुळे अमरावती शहरातील रस्ते निर्मनुष्य झाले होते. तर उन्हाचा तडाखा वाढल्याने जिल्हा रुग्णालयात तसेच तालुक्यातील ग्रामीण रुग्णालयात उष्माघात कक्ष तयार करण्यात आले आहे. तर शक्य असल्यासच दुपारी घराबाहेर पडा असं आवाहन आरोग्य विभागाने केलं आहे.