Sangali News: मयत व्यक्तीच्या बॅंक खात्यातील रक्कम गायब; एसबीआय बॅंकेतील खळबळजनक घटना उघडकीस

विजय पाटील

Sangali News: सांगलीच्या मिरजेत चक्क मयत व्यक्तीच्या बँक खात्यावरील 21 लाख रुपयांचा अपहार केल्याचा धक्कादायक प्रकार समोर आला आहे. या प्रकरणी स्टेट बँकेच्या तत्कालीन व्यवस्थापका विरोधात महात्मा गांधी चौक पोलिसात गुन्हा दाखल करण्यात आला आहे. (Latest State Bank News)

मिरज पंढरपूर रोडवरील स्टेट बँक ऑफ इंडिया या बँकेचे खातेदार असलेले रघुवीर कुमार रतन हे मूळचे बिहार मधील आहेत. काही वर्षांआधी ते मिरज येथील म्हाडा कॉलनी येथे राहत होते. दिनांक 11 मार्च 2018 रोजी त्यांचा मृत्यू झाला. मयत असताना त्यांच्या बँक खात्यावरील जमा असलेली एकूण रक्कम 21 लाख 28 हजार 364 रुपये काढण्यात आले. तत्कालीन बँक व्यवस्थापक अनिल साळे यांनी त्यांच्या पदाचा गैरवापर केल्याचे समजले आहे. साथीदार अवधूत पाटील यांच्याशी इतरांच्या खात्यावर सदरची रक्कम वर्ग करून तसेच वरील रकमेचा अपहार करून बँकेची फसवणून केल्याचे समोर आले आहे.

याबाबत सध्याचे बँक मॅनेजर मयूर चंद्रशेखर येळमल्ली यांनी पोलिसात तक्रार दिली आहे. बॅंकेचे कामकाज पाहत असताना सदर बाब त्यांच्या लक्षात आली. त्यानंतर त्यांनी याची पूर्ण माहिती मिळवली आणि पोलीस ठाणे गाठले. महात्मा गांधी चौक पोलिसात तत्कालीन बँक व्यवस्थापक अनिल साळे आणि अवधूत पाटील यांच्या विरोधात गुन्हा दाखल करण्यात आला आहे. पोलिसांनी या दोघांना अटक केल्याची माहिती देण्यात आली आहे. तर याबाबतचा पुढील तपास महात्मा गांधी चौक पोलीस ठाण्याचे सहाय्यक पोलीस निरीक्षक रविराज फडणीस करत आहेत.