Akola : अकोला पोलिसात खळबळ; कारवाई टाळण्यासाठी मागितली खंडणी, पोलिसांसह सुरक्षारक्षकावर गुन्हा दाखल

अक्षय गवळी 

अकोला : तरुणीची छेडखानी केल्याच्या आरोपातून तरुणाला मारहाण करण्यात आली. तर या तरुणावर कारवाई न करण्यासाठी त्यांच्याकडून पैशांची मागणी करण्यात आली होती. अर्थात पोलीस कर्मचाऱ्यांकडूनच हा प्रकार करण्यात आल्याने खळबळ उडाली आहे. दरम्यान खंडणी मागणाऱ्या पोलीस कर्मचाऱ्यासह बसस्थानकावरील एका सुरक्षारक्षकावर गुन्हा दाखल करण्यात आला आहे. या प्रकरणी तपास सुरु आहे.

अकोला शहरातील मध्यवर्ती बसस्थानकात हा धक्कादायक प्रकार घडला असून छेडखानीच्या आरोपावरून एका तरुणाला सुरक्षा रक्षक सुरज इंगळे आणि राहुल इंगळे या पोलीस कर्मचाऱ्याकडून तरुणाला बेदम मारहाण झाली होती. त्यानंतर कारवाई न करण्यासाठी त्याच्याकडून १५०० रुपये घेतले. या प्रकरणात अकोल्यातल्या सिव्हिल लाईन पोलिसांत कारवाईची भीती दाखवत खंडणी घेणाऱ्या दोघांवर गुन्हे दाखल झाला आहे. दरम्यान, ओम कोरडे असं मारहाण झालेल्या तरुणाचं नाव आहे. तर राहुल इंगळे असं पोलीस शिपायच आणि सुरज इंगळे असं बस स्थानकाच्या सुरक्षारक्षकाचं नाव आहे. 

दरम्यान, तरुणांनी दिलेल्या तक्रारीनुसार डाबकीरोड येथून परत गावी जाण्यासाठी बस स्थानकावर आलो असताना फलाट क्रमांक तीनवर बसलेलो असतांना अचानकपणे चार - पाच मुली उठून चौकीत गेल्या. त्यानंतर बसस्थानकावर ड्युटी करणाऱ्याने काहीही न विचारता लाथा बुक्यांनी मारहाण करायला सुरूवात केली. यानंतर पोलीस चौकी जवळ घेवून गेला. तेथे असलेल्या एका पोलीसाला सांगितले की हा मुलींची छेड करीत होता. येथेही पोलीसांकडून मारहाण झाली. त्यानंतर दोन हजार रूपये आहेत काय? जमानती साठी बान्डपेपरवर लागणार आहे. अशाप्रकारे दोघांनी खंडणी घेतली असल्याचे तक्रारीत म्हटले आहे.

दोघांवर गुन्हा दाखल 

दरम्यान, कारवाई न करण्यासाठी पैसे मागणाऱ्या पोलिस शिपायासह मध्यवर्ती बस स्थानकाच्या सुरक्षारक्षकावर हा गुन्हा दाखल झाला. तर सुरुवातीला पोलिस तक्रार घेण्यास टाळाटाळ करीत होते. मात्र, भाजपचे प्रदेश सरचिटणीस आमदार रणधीर सावरकर आणि आमदार प्रकाश भारसाकळे यांनी वरिष्ठ अधिकाऱ्यांशी संपर्क साधल्यावर कारवाईला वेग आला. या प्रकरणामुळे पोलिसांच्या कार्यक्षमतेवर प्रश्नचिन्ह निर्माण झाला.