पीक विमा योजनेत शेतकऱ्यांची क्रूर थट्टा, 3, 5 आणि 8 रूपयांची नुकसान भरपाई

अतिवृष्टीने बळीराजा जेरीस आला आहे. मराठवाडा, विदर्भात होत्याचं नव्हतं झालंय. अशा अस्मानी संकटातून बळीराजा कसाबसा सावरत असतानाच आता पीक विमा नुकसान भरपाईच्या नावानं जखमेवर मिठ चोळलंय. कारण अकोला जिल्ह्यातल्या शेतकऱ्यांना मिळालेल्या नुकसान भरपाईचे आकडे ऐकून तुमचीही तळपायाची आग मस्तकात गेल्याशिवाय राहणार नाही. केवळ 3 रुपये, 5 रुपये, 8 रुपये, 21 रुपये अशी नुकसान भरपाई देऊन शेतकऱ्यांची क्रूर थट्टा केलीये. शासनाला जर शेतकऱ्यांचा सन्मान करता येत नसेल तर असे दोन-पाच रुपये देऊन अपमान तरी करू नये, असं शेतकऱ्यांचं म्हणणं आहे.

प्रधानमंत्री पिक विमा योजनेअंतर्गत सुमारे 20 ते 25 शेतकऱ्यांच्या खात्यात अशी तुटपुंजी रक्कम जमा झाली आहे.शेतकऱ्यांच्या खात्यात जमा झालेली रक्कम जिल्हाधिकाऱ्यांकडे धनादेशच्या स्वरूपात परत केलीय. शेतकऱ्यांची थट्टा करणे थांबवावे, अशी विनंती ही शेतकऱ्यांनी निवेदनातून केली आहे. आधीच अस्मानी संकटाने पिचलेल्या शेतकऱ्यांना आता सुल्तानी संकटाचेही चटके सहन करावे लागत आहेत...