Maharashtra Politics: ठाकरे गटाचा पुन्हा 'सांगली' पॅटर्न! अंतिम चर्चेआधीच संजय राऊतांनी २ जागांवर दावा ठोकला; 'मविआ'त वादाची ठिणगी

सुशिल थोरात, अहमदनगर|ता. १४ जुलै २०२४

अहमदनगर येथील श्रीगोंदा येथे उद्धव बाळासाहेब ठाकरे शिवसेनेचे उपनेते साजन पाचपुते यांच्या संपर्क कार्यालयाचे उद्घाटन खासदार संजय राऊत यांच्या हस्ते करण्यात आले. यावेळी कार्यक्रमात बोलताना संजय राऊत यांनी श्रीगोंदा अन् अहमदनगर शहरची जागा ठाकरे गट लढवणार असल्याचे जाहीर केले. मात्र महाविकास आघाडीची जागा वाटपाची चर्चाही सुरू झाली नसताना संजय राऊतांनी दोन जागांवर दावा ठोकल्याने मविआमध्ये वादाची ठिगणी पडण्याची शक्यता आहे.

राज्याच्या राजकारणात आता विधानसभा निवडणुकांचे वारे वाहू लागले आहेत. त्यामुळे आता सर्वच पक्ष कामाला लागले असून महाविकास आघाडी आणि महायुतीमध्ये पुन्हा एकदा जागा वाटपावरुन कलगीतुरा रंगण्याची शक्यता आहे. विशेष म्हणजे विधानसभेपर्यंत या आघाड्या अभेद्य राहणार की नाही? जागा वाटपाचा फॉर्म्युला काय असेल? याबाबत चर्चा झाली नसतानाच संजय राऊत यांनी दोन जागांवर दावा ठोकला आहे.

संजय राऊत यांनी अहमदनगर जिल्हा दौऱ्यावर असताना श्रीगोंदा येथील जागा शिवसेना उपनेते साजन पाचपुते लढणार असल्याचे भाषणात जाहीर केले आहे. तसेच अहमदनगर शहर विधानसभेची जागा शिवसेनेचीच असून त्या ठिकाणीही तयारीला लागा अशा सूचना त्यांनी पदाधिकाऱ्यांना दिल्यात.

त्या ठिकाणी आलेल्या पदाधिकाऱ्यांशी चर्चा करून नगर शहर विधानसभा मतदार संघ आपलाच आहे त्यासाठी कामाला लागा उमेदवार नंतर ठरवू असा संदेश खासदार संजय राऊत यांनी शिवसेनेच्या पदाधिकाऱ्यांना दिला आहे. त्यामुळे आता सांगलीप्रमाणे पुन्हा एकदा मविआमध्ये वादाची ठिणगी पडणार का? हे पाहणे महत्वाचे ठरणार आहे.