Yavatmal News: अहिल्यादेवी होळकर जयंतीनिमित्त काढलेल्या मिरवणुकीवर दगडफेक, यवतमाळच्या मुळावा येथील घटना

संजय राठोड, साम टीव्ही, यवतमाळ प्रतिनिधी

यवतमाळमधील उमरखेड तालुक्यातील मुळावा येथे अहिल्यादेवी होळकर यांच्या जयंतीनिमित्त काढण्यात आलेल्या मिरवणुकीवर अज्ञातांनी दगडफेक केल्याची घटना घडली आहे.

या दगडफेकीमध्ये जवळपास 15 ते 20 जण गंभीर जखमी झाले असून त्यातील तीन जखमींना उमरखेड येथील उत्तरवार रुग्णालयात उपचारासाठी दाखल करण्यात आले आहे. काही जखमींवर मुळावा येथील प्राथमिक आरोग्य केंद्रामध्ये उपचार सुरू आहे. सध्या मुळावा येथील वातावरण तापलं असून पोलीस घटनास्थळी दाखल झाले आहेत.

मिळालेल्या माहितीनुसार, अहिल्यादेवी होळकर यांच्या जयंतीनिमित्त यवतमाळ जिल्ह्यातील शेवटच्या टोकावर असलेल्या उमरखेड तालुक्यातील मुळावा या गावात मिरवणूक निघाली असताना अज्ञातांनी अंदाधुंद दगडफेक केल्याने मिरवणुकीतील 15 ते 20 जण गंभीर जखमी झाले.

या घटनेची माहिती परिसरात वाऱ्यासारखी पसरल्याने वातावरण तापलं आहे. या घटनेची माहिती मिळताच यवतमाळ जिल्हा पोलीस अधीक्षक डॉक्टर पवन बनसोड, अप्पर पोलीस अधीक्षक पियूष जगताप आणि उमरखेड उपविभागीय पोलीस अधिकारी हनुमंतराव गायकवाड यांच्यासहघटनास्थळी दाखल झाले. हे प्रकरण शांत करण्याचा प्रयत्न पोलिसांकडून केला जात आहे. दरम्यान, दगडफेक करणाऱ्यांचा शोध पोलिसांकडून घेतल्या जात आहेत.