Solapur News: विश्वास बसत नसला तरी हे सत्य आहे, काळ्या म्हशीनं चक्क पांढऱ्या शुभ्र रेडकूला दिला जन्म; दुर्मिळ दृश्य पाहायला सारं गाव जमलं

Solapur News: सोशल मीडियावर नेहमीच थक्क करणाऱ्या अनेक गोष्टी व्हायरल होत असतात. सोलापूरातील मोहोळ तालुक्यातील वडवळ गावात अशीच चकित करणारी एक घटना घडली आहे. एका काळ्या म्हशीने चक्क गाईच्या वासरा प्रमाणे पांढऱ्या शुभ्र रेडकाला जन्म दिला आहे. काळ्या म्हशीच्या पोटी जन्मलेल्या पांढऱ्या पिल्लाला पाहण्यासाठी संपूर्ण गावाने गर्दी केली आहे. सोशल मीडियावर या वासराची चांगलीच चर्चा रंगली आहे. (Latest Marathi News)

मिळालेल्या माहितीनुसार, वडवळ येथील अल्पभूधारक शेतकरी (Farmer) राजकुमार कोटीवाले यांच्या म्हशीने पांढऱ्या रेडकाला जन्म दिला आहे. राजकुमार यांचा शेतीसह पशुपालनाचा व्यवसाय आहे. आपल्या म्हशीने पांढऱ्या रेडकाला जन्म दिल्याने त्यांना देखील याचं मोठं नवल वाटतं आहे. आजवर त्यांनीही पहिल्यांदाच हे दुर्मिळ दृश्य पाहिल्याचे त्यांनी सांगितले आहे.

आता पर्यंत काळ्या म्हशीने (Buffalo) अंगावर किंवा डोक्यावर पांढरा डाग असेल्या रेडकाला जन्म दिला असल्याचे तुम्ही पाहिले असेल. मात्र पहिल्यांदाच संपूर्ण पांढऱ्या रेडकूला जन्म दिलेली ही फार दुर्मिळ घटना आहे. सर्वांनाच याचे नवल वाटत आहे. असा अजब प्रकार घडल्यावर पशुवैद्यकीय डॉक्टरांच्या म्हणण्यानुसार, जनुकांच्या मिश्रणामुळे रंगावर परिणाम झाल्याचे म्हटले जात आहे. म्हैस आणि रेडकू या दोघांची प्रकृती चांगली आहे.