Jalna : बॉयफ्रेंडच्या घरातच १८ वर्षांच्या तरूणीचा मृतदेह आढळला, जालन्यात खळबळ

अक्षय शिंदे, जालना प्रतिनिधी

Jalna Latest News : जालनातील भोकरदन तालुक्यातील फत्तेपुर गावात १८ वर्षीय तरुणीने टोकाचा निर्णय घेतला. बॉयफ्रेंडच्या बदनामीच्या धमकीला कंटाळून शिवानी गिरी या १८ वर्षीय तरूणाने आत्महत्या केली. शिवानीचा मृतदेह तिच्या प्रियकराच्या घरी आढळल्याने गावात एकच खळबळ उडाली आहे. या प्रकरणी भोकरदन पोलिसांनी आरोपी विशाल आघाम याच्यासह पाच जणांविरुद्ध आत्महत्येस प्रवृत्त केल्याप्रकरणी गुन्हा दाखल केला आहे. पोलिसांनी आरोपी विशाल आघाम याच्यासह ५ जणांना बेड्या ठोकल्या आहेत.

पोलिसांनी दिलेल्या माहितीनुसार, आरोपींना न्यायालयात हजर केले असता, न्यायालयाने त्यांना चार दिवसांची पोलीस कोठडी सुनावली आहे. दरम्यान, शिवानीच्या नातेवाइकांनी हा आत्महत्या नसून तिची हत्या झाल्याचा गंभीर आरोप केला आहे. या प्रकरणाचा तपास भोकरदन पोलीस तीव्रतेने करत आहेत. मृतदेह शवविच्छेदनासाठी पाठवण्यात आला आहे. या घटनेने परिसरात तणाव निर्माण झाला असून, पोलिसांनी पुढील तपास सुरू केला आहे. नातेवाइकांच्या आरोपांमुळे या प्रकरणाला वेगळे वळण मिळण्याची शक्यता आहे.