Eknath Shinde : एकनाथ शिंदेंच्या भावाच्या जागेत १४५ कोटींचं ड्रग्ज सापडलं, अंधारेंचा आरोप, प्रकाश शिंदे म्हणाले....

विकास काटे, साम टीव्ही प्रतिनिधी

Eknath Shinde Satara Latest News Update : सातारा जिल्ह्यातील सावरीगाव येथे सापडलेल्या एमडी कारखान्याची आपला काहीही संबंध नसल्याचे स्पष्टीकरण ठाण्यातील माजी नगरसेवक प्रकाश शिंदे यांनी दिले आहेत. राजकीय द्वेषातून आपले नाव या प्रकरणात गोवले जात असल्याचेही त्यांनी स्पष्ट केले.

(Eknath Shinde brother drug factory controversy)

सातारा जिल्ह्यातील तो कारखाना आणि ती जमीन आपली नाही. जिथे छापा पडला ती जमीन आपल्या जमिनीपासून अडीच ते तीन किलोमीटर लांब आहे. माझ्या जमिनीचा सातबारा गट १७ / १ अ असा असून छापा पडलेल्या जमिनीचा गट ४/१ असा आहे. तर शिंदे कुटुंबियांच्या ज्या जमिनीचा उल्लेख विरोधकांनी केला ती जमीन योगायोगाने नव्हे तर वडिलोपार्जित असल्याने आमच्याकडे आली आहे. या जमिनीचा गट क्रमांक ३०/१० असा आहे. तसेच छापा पडलेल्या ठिकाणापासून ती १५ ते १६ किलोमीटर लांब असल्याचेही प्रकाश शिंदे यांनी स्पष्ट केले आहे.

माझ्या स्वतःच्या जागेवर कोणतेही फाईव्ह स्टार हॉटेल होणार नसून तिथे स्थानिकांना रोजगार मिळावा यासाठी कृषी पर्यटन सुरू करण्याचा माझा मानस आहे. ही जागा रणजीत शिंदे याला विकण्यात आली असून त्याची कागदपत्रे आमच्याकडे आहेत. तसेच रणजीत हा फरार झाला नसून गावातच आहे. पोलिसांच्या एफआयआरमध्ये कुठेही रणजीत शिंदे याच्या नावाचा उल्लेख नाही. तसेच या गुन्ह्यात त्याचा कोणताही संबंध नसल्याचे पोलिसांनी स्पष्ट केले आहे. इथे सुरू असलेल्या हॉटेलमधून आरोपींना कोणतही जेवण जात नव्हते हेदेखील पोलिसांच्या चौकशीत स्पष्ट झाले आहे.

त्यामुळे केवळ राजकिय द्वेषापोटी हे आरोप केले जात असून, माझा आणि माझ्या कुटुंबीयांचे नाव त्यात ओढून आम्हाला बदनाम करण्याचा कट रचला जात असल्याचे प्रकाश शिंदे यांनी साधार स्पष्ट केले . उबाठा आणि काँग्रेसने याबाबत केलेले सर्व आरोप हे बिनबुडाचे, निराधार आणि खोटे आहेत. त्यामुळे त्यांनी हे आरोप मागे घेतले नाहीत तर त्यांचा विरोधात अब्रुनुकसानीचा दावा दाखल केला जाईल, अशा इशारा प्रकाश शिंदे यांनी दिला आहे.