तन्मय टिल्लू, साम टीव्ही, प्रतिनिधी
लोकसभेचा निकालही लागत नाही तोच विधान परिषदेवरुन महायुतीत खडाखडी सुरू झाल्याचं समोर येतयं. त्याला कारण ठरलंय राज ठाकरेंनी कोकण पदवीधर मतदारसंघ निवडणुकीसाठी अभिजीत पानसेंच्या नावाची केलेली घोषणा. ऐनवेळी राज ठाकरेंनी उमेदवारी जाहीर केल्यामुळे, महायुतीच्या गोटात मिठाचा खडा पडल्याची चर्चा रंगली आहे.
लोकसभेत मोदींना बिनशर्त पाठिंबा देणाऱ्या राज ठाकरेंनी, भाजपचा बालेकिल्ला समजला जाणाऱ्या कोकण पदवीधर मतदारसंघ निवडणुकीत मनसेकडून अभिजीत पानसेंची उमेदवारी जाहीर केली. भाजपसाठी हा मोठा धक्का मानला जातोय. कोकण पदवीधर हा भाजपचा पारंपारिक मतदारसंघ समजला जातो आणि याच मतदारसंघात निरंजन डावखरे हे भाजपचे विद्यमान आमदार आहेत. त्यामुळे राज ठाकरेंनी अचानक अभिजीत पानसेंचं नाव जाहीर करून भाजपची पुरती गोची केलीये.
त्यामुळे लोकसभा निवडणुकीत पंतप्रधान मोदी आणि महायुतीला बिनशर्त पाठिंबा देणारे राज ठाकरे आता भाजपच्या विरोधात जाण्याची शक्यता आहे. मात्र भाजप आमदार मंत्री रवींद्र चव्हाणांनी महायुतीच्या उमेदवाराबाबत वरिष्ठच निर्णय घेतील, असं म्हटलं असलं तरी भाजप पारंपारिक जागा सोडणार का याबाबत त्यांनी सावध भूमिका घेतलीये.
आता कोकण पदवीधर मतदारसंघात कोण माघार घेणार आणि कोण मैदानात राहणार यापेक्षा मनसे भाजपला झुकवून पानसेंची उमेदवारी कायम ठेवून आपलं राजकीय वजन वाढवणार का हे महत्त्वाचं असेल. तसंच ही एकला चलो रेची भूमिका राज ठाकरे आगामी विधानसभेत काय ठेवणार का याकडे लक्ष लागलंय.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.