सुनिल काळे, साम टीव्ही
पुणे - मुंबई एक्स्प्रेस वेवर राहुल शेवाळे आणि श्रीकांत शिंदेंच्या विजयाचे बॅनर झळकले आहेत. उर्से टोल नाका तळेगाव दाभाडे येथे शिंदे समर्थकांची पोस्टरबाजी केली आहे. राहुल शेवाळे आणि श्रीकांत शिंदे यांना खासदार झाल्याच्या शुभेच्छा यातून देण्यात आल्या आहेत. निकाल लागण्याआधीच निवडणूक जिंकल्याची पोस्टरबाजी शिंदे गटाकडून सुरू झालीये.
अधिक माहिती अशी की, तुषार सोनवणे यांनी हे बॅनर लावले आहे. बॅनरवर दक्षिण-मध्य मुंबई लोकसभा मतदारसंघाचे महायुतीचे उमेदवार राहुल शेवाळे आणि कल्याण लोकसभा मतदारसंघाचे महायुतीचे उमेदवार श्रीकांत शिंदे यांचे नाव आणि फोटो छापण्यात आला आहे. दोन्ही उमेदवरांचे नाव आणि फोटोसमोर तुषार सोनवणे यांनी स्वत:चा फोटो आणि नाव लिहिलत अभिनंदन केलं आहे.
राज्यात लोकसभा निवडणुकीची रणधुमाळी सुरू आहे. महाराष्ट्रात ५ टप्प्यांतील मतदान झाले असून ४ जून रोजी निवडणुकीचा निकाल जाहीर होणार आहे. मात्र त्याआधील अनेक उमेदवारांच्या विजयाचे पोस्टर चौका-चौकात झळकताना दिसत आहेत.
काल पुणे सातारा महामार्गावर शिंदेवाडी गावाच्या हद्दीत निकाला आधीच महाविकास आघाडीच्या बारामती लोकसभेच्या उमेदवार सुप्रिया सुळे यांच्या विजयाचे बॅनर लावण्यात आले होते. शिवसेना ठाकरे गटाचे भोर तालुकाप्रमुख ज्ञानेश्वर शिंदे यांनी हे बॅनर लावले होते.
सुप्रिया सुळे यांची बारामती लोकसभा खासदार पदी निवड झाल्याबद्दल हार्दिक अभिनंदन, गुलाल आपलाच.."कोण म्हणतोय येत नाय, आल्याशिवाय राहत नाय", अशा आशयाचा मजकूर बॅनरवर लिहिण्यात आला होता.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.