Maharashtra Politics 2024 : संजय निरुपम, रविंद्र वायकरांना मनसे पाठिंबा देणार का? ; शालिनी ठाकरे यांनी स्पष्टच सांगितलं

लोकसभेच्या दुसऱ्या टप्प्यातील निवडणुका लवकरच पार पडणार आहेत. मात्र अद्यापही उमेदवारी जाहीर करण्यात आलेली नाही. मात्र ज्या उमेदवारांची महायुतीकडून उत्तर पश्चिम मुंबई मतदारसंघासाठी चर्चा सुरू आहे, अशा दोन्ही उमेदवारांना भाजप आणि मनसेकडून प्रचंड विरोध केला जात आहे. अशातच मनसे सरचिटणीस शालिनी ठाकरे यांनी या उमेदवारांना विरोध करणारी पोस्ट एक्सवर प्रसिद्ध केली आहे.

मनसेला 'धनुष्य बाण' चिन्हावर लढायला सांगणार्‍यावर दुसर्‍या पक्षातून उमेदवार आयात करण्याची नामुष्की ओढवली आहे. लक्षात ठेवा राज ठाकरे यांनी फक्त देशाला सक्षम नेतृत्व मिळावं यासाठी पंतप्रधान नरेंद्र मोदी यांना पाठींबा दिला आहे. इकडून तिकडून आलेले संजय निरुपम आणि भ्रष्टाचारी रविंद्र वायकरांसारख्या उमेदवारांसाठी महाराष्ट्र सैनिकांचा पाठींबा गृहीत धरू नये.

संजय निरुपम ज्यांची त्यांच्याच पक्षातून हकालपट्टी झाली. भाजपचे सुद्धा काही नेते म्हणाले की इतर पक्षातील कचरा घेऊ नका. अशा माणसांना आपण खासदारकीचे उमेदवारी देणार आहोत का आणि पक्षात घेणार आहोत का? आणि दुसऱ्या बाजूला रवींद्र वायकर यांना त्यांच्याच जोगेश्वरी विधानसभेमध्ये विरोध आहे. मग ते उत्तर पश्चिमचे उमेदवार कसे होतील? या दोन्ही उमेदवारांच्या चर्चेमुळे मनसैनिकांची जी भावना आहे ती मी व्यक्त केली आहे.

मनसे अध्यक्ष राज ठाकरे यांनी पंतप्रधान नरेंद्र मोदी यांना बिनिश्वर्त पाठिंबा दिला आहे आणि आम्ही सर्व मनसेचे कार्यकर्ते त्यांच्या आदेशाचे पालन करणार आहेत. अजूनही महायुतीचे उमेदवार द्यायचे आहेत. जी दोन नावे चर्चेत आहेत त्यांना मोठा विरोध असल्याचं त्यांनी म्हटलं आहे.