Maharashtra Election: शिरूरमधून भुजबळांना उमेदवारी देण्याचा होता प्लॅन; अमोल कोल्हेंचा गौप्यस्फोट

MP Amol kolhe On Shirur Constituency : महायुतीमध्ये नाशिकचा तिढा सुटत नाहीय, तर दुसरीकडे खासदार अमोल कोल्हेंच्या वक्तव्यामुळे नवा वाद निर्माण झालाय. मुख्यमंत्री एकनाथ शिंदे माझ्याविरोधात छगन भुजबळांना उमेदवारी देणार होते, असा दावा अमोल कोल्हे यांनी केलाय. त्याला खुद्द भुजबळांनीच दुजोरा दिलाय. नाशिकमधून माझं नाव पुढे आल्यानंतर मुख्यमंत्र्यांनी मला फोन केला.

शिरूरमधून लढता का? असे विचारलं होतं, असं भुजबळ म्हणालेत. मी शिरूरमधून निवडणूक लढवली तर नाशिकची जागा त्यांना मिळाली असती, असा त्यामागे हेतू होता. मात्र मी नाशिक सोडून जायचा प्रश्नच येत नाही. त्यामुळे मी मुख्यमंत्री एकनाथ शिंदे यांच्या मागणीला नकार दिला, असे स्पष्टीकरण छगन भुजबळ यांनी दिले आहे.

महायुतीमध्ये नाशिकच्या जागेचा मुद्दा प्रचंड गाजतोय. अजूनही नाशिकमधून महायुतीकडून उमेदवारी जाहीर झालेली नाही. शिवसेना शिंदे गटाचे हेमंत गोडसे आणि भाजपाचे स्थानिक नेते सुद्धा या जागेवर दावा सांगतात. दुसरीकडे छगन भुजबळ यांनी माघार घेतल्यानंतरही राष्ट्रवादीनं नाशिकच्या जागेवरचा दावा सोडला नाही. समता परीषदेच्या पदाधिका-यांनीही बैठक घेऊन भुजबळांनी निवडणूक लढवावी, असा आग्रह धरला आहे.

दरम्यान मला उमेदवारी नाही म्हणून कोणी नाराज आहे असे नाही. सगळ्या गोष्टी आता मागे गेल्या आहेत, असं भुजबळ म्हणतायेत. उमेदवारी उशिरा जाहीर करण्याचा महायुतीला फटका बसू शकतो. तसेच महातिढा सुटल्यावरही महायुतीच्या उमेदवारासाठी सगळे मित्र पक्ष एकदिलानं काम करणार का? हाच खरा प्रश्न आहे.