Akola Lok Sabha Election Result: अकोल्यात कमळ फुललं! तिरंगी लढतीत अनुप धोत्रेंचा विजय, प्रकाश आंबेडकरांचा पराभव

अकोला लोकसभा मतदारसंघात भाजप आणि काँग्रेसमध्ये टफ फाईट पाहायला मिळाली. मतमोजणीत भाजपचे अनुप धोत्रे आघाडीवर असल्याचे पाहायला मिळाले होते. अखेर अनुप धोत्रे यांनी काँग्रेसच्या अभय पाटील यांना पराभवाची धूळ चारत दणदणीत विजय मिळवला आहे. अकोला लोकसभा मतदारसंघात अनुप धोत्रे,अभय पाटील आणि वंचित आघाडीचे प्रकाश आंबेडकर यांच्यात तिरंगी लढत पाहायला मिळाली. अखेर अनुप धोत्रे यांनी मोठी आघाडी घेत प्रकाश आंबेडकर आणि अभय पाटील यांचा पराभव केला आहे.

अकोला लोकसभा मतदारसंघात हा भाजपचा सलग चौथा विजय ठरला आहे. यापूर्वी २००९, २०१४ आणि २०१९ मध्ये झालेल्या लोकसभा निवडणूकीत संजय धोत्रे यांना भाजपकडून उमेदवारी दिली गेली होती. तिन्ही वेळेस भाजपने आपला गड राखत शानदार विजय मिळवला होता. तर प्रकाश आंबेडकर हे विरोधात होते. या तिन्ही वेळेस प्रकाश आंबेडकरांना पराभवाचा सामना करावा लागला होता.

यावेळी भाजपने संजय धोत्रे यांचे चिरंजीव अनुप धोत्रे यांच्यावर विश्वास दाखवला आणि त्यांना उमेदवारी दिली. हा विश्वास सार्थ ठरवत त्यांनी पुन्हा एकदा आपला गड राखला आहे. या निवडणूकीत अनुप धोत्रे यांनी प्रकाश आंबेडकर आणि अभय पाटील यांना पराभूत केलं आहे. मतमोजणीत अनुप धोत्रे यांनी पंधराव्या फेरीपर्यंत ११ हजार ८८९ मतांची आघाडी घेतली होती.