Womens Health: लहान वाटणाऱ्या समस्या महिलांसाठी ठरू शकतात घातक; या लक्षणांकडे दुर्लक्ष नको

आजकाल महिला घर, कुटुंब, नोकरी यांची जबाबदारी अगदी चोख पार पाडतात. त्यांच्यावर असलेल्या या कामाच्या भारामुळे स्वतःच्या आरोग्याकडे मात्र दुर्लक्ष होतं. अनेकदा छोट्या-छोट्या तक्रारी त्यांना सामान्य वाटतात पण डॉक्टरांच्या मते हीच लक्षणं पुढे जाऊन गंभीर आजारांचं रूप घेऊ शकतात.

योग्य वेळी हे संकेत ओळखून योग्य पावलं उचलणं अत्यंत आवश्यक आहे. जर एखाद्या महिलेला सतत वेदना होत असतील जरी त्या हलक्या असल्या तरी त्याकडे दुर्लक्ष करू नये कारण यामुळे गंभीर आजारांचा धोका वाढू शकतो.

हृदयाशी संबंधित आजारांचे संकेत

अनेकदा महिलांमध्ये हृदयाशी संबंधित समस्यांची लक्षणं दिसून येतात. मात्र महिला त्यांना किरकोळ समजतात. जसं की अचानक जबड्यात वेदना होणं किंवा रोजच्या छोट्या कामानंतर थकवा जाणवणं. ही लक्षणं छातीत तीव्र वेदना होण्यासारखी नसतात त्यामुळे त्याकडे लक्ष दिले जात नाही. पण असे संकेत दिसल्यास स्वतः उपचार करण्याऐवजी त्वरित डॉक्टरांचा सल्ला घेणं आवश्यक आहे.

मासिक पाळीशी संबंधित समस्या

अनियमित मासिक पाळी, पाळीदरम्यान होणाऱ्या असह्य वेदना, अत्याधिक रक्तस्राव किंवा अचानक पाळी थांबणं हे सामान्य नाही. अनेक महिला याकडे दुर्लक्ष करून म्हणतात की, हे प्रत्येक महिलेसोबत घडतं. मात्र प्रत्यक्षात हे हार्मोनल असंतुलन, पीसीओएस किंवा इतर स्त्रीरोगांचे संकेत असू शकतात. वेळेवर उपचार न झाल्यास याचा परिणाम प्रजननक्षमतेवरही होऊ शकतो.

पोट आणि पचनाच्या तक्रारी

जर वारंवार गॅस, बद्धकोष्ठता, आम्लपित्त किंवा पोटदुखी होत असेल तर याला किरकोळ समस्या समजू नये. दीर्घकाळ अशी समस्या राहिल्यास त्यामुळे पचनसंस्थेचा आजार, अन्नाची अॅलर्जी किंवा डायबिटीज यांचे संकेत असू शकतात.

चक्कर येणं आणि थकवा

अनेकदा अचानक उभं राहिल्यावर चक्कर येणं किंवा चेहऱ्याचा रंग बदलणं हे सामान्य अशक्तपणा मानलं जातं. पण हे रक्ताची कमतरता म्हणजेच अॅनिमियाचे लक्षण असू शकतं. जास्त रक्तस्रावामुळे शरीरात लोहाची कमतरता होते ज्यामुळे पेशींना योग्य प्रमाणात ऑक्सिजन मिळत नाही.

प्रसूतीनंतर सतत उदास वाटणं

प्रसूतीनंतर जर दोन आठवड्यांपेक्षा जास्त काळ उदास वाटत राहिलं किंवा मनावर ओझं असल्यासारखं वाटत असेल तर याला किरकोळ भावनिक बदल मानू नये. हे डिप्रेशनचं लक्षण असू शकतं.

डिस्क्लेमर : वरील माहिती आम्ही फक्त वाचक-प्रेक्षकांना देत आहोत. आम्ही याचं समर्थन अथवा दावा करत नाही. कोणतेही उपचार, डाएट आणि औषधं तज्ज्ञांच्या सल्ल्यानंच घ्यावीत.