Heart Attack: हार्ट अटॅक कधीही येऊ शकतो, ही ५ लक्षणं वेळोवेळी देतात संकेत, दुर्लक्ष करून चालणार नाही!

हार्ट अटॅक ही अत्यंत गंभीर समस्या आहे. याची लक्षणे काही सांगता येत नाहीत. या आजाराने मृत्यू होणाऱ्या रुग्णांमध्ये मोठ्या संख्येने वाढ होताना पाहायला मिळत आहे. हा आजार ओळखता येऊ शकतो. त्यासाठी काही सूक्ष्म संकेतांकडे लक्ष दिले पाहिजे. कारण कोणत्याही गंभीर आजारापुर्वी शरीर वेळोवेळी संकेत देत असते. याकडे लक्ष दिल्याने तुम्ही हार्ट अटॅकसारखा गंभीर आजार सहज टाळू शकता.

ज्येष्ठ हृदयरोगतज्ज्ञ डॉ. आलोक चोप्रा यांनी हे मत व्यक्त केले आहे. आशलोक हॉस्पिटलचे सहसंस्थापक आणि कन्सल्टंट कार्डिओलॉजिस्ट असलेल्या डॉ. चोप्रा यांनी त्यांच्या इंस्टाग्राम पोस्टद्वारे हृदयाशी संबंधित काही ‘सायलेंट’ इशारे सांगितले आहेत, जे बरेच लोक सहजपणे दुर्लक्षित करतात.

जर तुम्ही रोज ठरलेली कामे करत असाल आणि तुम्हाला अचानक दम लागत असेल छातीत श्वास घेताना कळा जाणवत असतील हा त्यातील एक महत्त्वाचा इशारा ठरू शकतो. ही समस्या काही क्षणांपुरतीच असते. पण महत्वाची असते. जिने चढताना, चालताना किंवा अगदी झोपेत असतानाही धाप लागणे हे हृदय पुरेशा प्रमाणात ऑक्सिजनयुक्त रक्त पंप करू शकत नसल्याचे लक्षण असू शकते.

याशिवाय सतत थकवा जाणवणे हेही हृदयाकडे लक्ष देण्याचे संकेत असू शकतात. पुरेशी विश्रांती घेतल्यानंतरही शरीरात ऊर्जा न वाटणे, साधी कामे करतानाही प्रचंड थकवा येणे यामागे हृदयाची कार्यक्षमता कमी होणे कारणीभूत असू शकते. हृदय योग्य प्रकारे रक्त पंप न केल्यास शरीरातील ऊर्जेची पातळी घसरते, असे तज्ज्ञ सांगतात.

हृदयाच्या ठोक्यांमध्ये अचानक बदल जाणवणे, ठोके चुकणे, धडधड वाढणे किंवा अनियमित ठोके जाणवणे हे देखील दुर्लक्षित करू नयेत. असे बदल इतर लक्षणांसोबत जाणवत असतील, तर ते हृदयावर ताण असल्याचे संकेत देऊ शकतात. अनेक वेळा लोक हे तणाव किंवा थकव्यामुळे झाले असे समजून दुर्लक्ष करतात, पण त्यामागे गंभीर कारण असू शकते.

झोपेशी संबंधित समस्या देखील हृदयाच्या आरोग्याशी जोडलेल्या असू शकतात. वारंवार झोपेतून जाग येणे, झोपताना गुदमरल्यासारखे वाटणे किंवा सपाट झोपता न येणे हे हृदयावर अतिरिक्त ताण असल्याचे दर्शवू शकते. दीर्घकाळ अशी अवस्था राहिल्यास डॉक्टरांचा सल्ला घेणे महत्त्वाचे ठरते.