Avoid Using Phone In Toilet: टॉयलेटमध्ये फोन वापरणं म्हणजे आजारांना निमंत्रण! जाणून घ्या सविस्तर

सध्याच्या डिजिटल युगात स्मार्टफोन आपल्या जीवनाचा अविभाज्य भाग बनला आहे. आपण तो स्वयंपाकघरात असो, जेवणाच्या टेबलावर असो किंवा अगदी शौचालयात असो, सतत हाताळत असतो. परिणामी, फोनवर विविध प्रकारचे बॅक्टेरिया आणि विषाणू साचण्याची शक्यता प्रचंड वाढते. विशेष म्हणजे आपण दिवसभरात सर्वाधिक वेळा हातात घेत असलेला हा फोन मात्र स्वच्छ करण्याकडे दुर्लक्ष करतो. त्यामुळे संसर्ग होण्याचा धोका अधिकच वाढतो.

अभ्यासातून असे समोर आले आहे की, फोनवर टॉयलेट सीटपेक्षा अधिक बॅक्टेरिया आढळतात. त्यामुळे फोनची स्वच्छता करणे ही आता केवळ स्वच्छतेपुरती मर्यादित राहिलेली नसून, ती आरोग्याच्या दृष्टीने आवश्यक बाब बनली आहे. आठवड्यातून किमान एकदा तरी फोनची योग्य प्रकारे स्वच्छता करणे गरजेचे आहे. विशेषतः फोन रुग्णालय, सार्वजनिक वाहतूक, जिमसारख्या ठिकाणी नेल्यास, स्वच्छतेच्या वेळा अधिक वाढवाव्या लागतील. कारण अशा ठिकाणी फोनवर सुमारे २२०० पेक्षा अधिक सूक्ष्मजीव सापडण्याची शक्यता असते.

परंतु, फोन स्वच्छ करताना योग्य उत्पादनांचा वापर करणे अत्यंत आवश्यक आहे. चुकीचे केमिकल क्लिनर वापरल्यास फोनच्या वॉटरप्रूफ सीलिंग, टच सेन्सिटिव्हिटी आणि स्क्रीनवरील सुरक्षात्मक कोटिंग यांचे नुकसान होऊ शकते. ब्लीच, हायड्रोजन पेरॉक्साईड, व्हिनेगर, एअरोसोल स्प्रे किंवा विंडो क्लीनर यांचा वापर टाळावा, असे तज्ञ सुचवतात.

नेमके कसा फोन स्वच्छ कराल?

फोन स्वच्छ करताना सर्वप्रथम तो चार्जर व कव्हरपासून वेगळा करावा. चार्जिंग पोर्ट, स्पीकर ग्रिलसारख्या नाजूक भागांची सफाई करण्यासाठी अँटी-स्टॅटिक ब्रशचा वापर करावा. थेट फोनवर कोणतेही द्रव फवारू नये. टिश्यू पेपर किंवा खरडणारे कपडे वापरणे टाळावे. ७० टक्के आयसोप्रोपिल अल्कोहोलयुक्त वाइप्स आणि मायक्रो फायबर कापडाचा वापर हा सर्वात सुरक्षित आणि प्रभावी उपाय आहे.

खाण्यापूर्वी जसे आपण हात धुणे आवश्यक समजतो, तसाच आपल्या मोबाईल फोनची देखील नियमित स्वच्छता करणे गरजेचे आहे. अन्यथा, आपल्या नकळत फोनवरून संसर्गाचा धोका वाढू शकतो. त्यामुळे आरोग्य राखण्यासाठी आणि संसर्गापासून बचाव करण्यासाठी मोबाईल फोन स्वच्छ ठेवण्याची सवय अंगीकारणं आवश्यक आहे.