Samay Raina: समय रैनाला कोर्टाने झापलं, दिव्यांगांची चेष्टा करण्यावरून SC नाराज, दिले हे आदेश

Supreme Court On Samay Raina: सुप्रीम कोर्टाने आज एक महत्त्वपूर्ण निर्णय देत सोशल मीडिया इन्फ्लुएंसर्सना फटकारले आहे. कॉमेडियन समय रैना याच्यासह काही यूट्यूबर्स आणि पॉडकास्ट होस्टनी दिव्यांग व्यक्तींवर उपहासात्मक आणि अपमानास्पद वक्तव्ये केली होती. या संदर्भात दाखल झालेल्या याचिकेवर सुनावणी करताना कोर्टाने स्पष्ट केले की, “अभिव्यक्ती स्वातंत्र्य म्हणजे इतरांच्या भावना दुखावणे नव्हे.”

न्यायालयाने समय रैना आणि इतर संबंधित इन्फ्लुएंसर्सना सार्वजनिकरीत्या माफी मागण्याचा आदेश दिला आहे. त्यांनी ज्या माध्यमांवर हे वक्तव्य केले त्या सर्व प्लॅटफॉर्मवर त्यांना व्हिडिओ किंवा पोस्टच्या माध्यमातून दिलगिरी व्यक्त करावी लागणार आहे. कोर्टाने चेतावणी दिली की जर त्यांनी माफी मागितली नाही तर त्यांच्या विरोधात आर्थिक दंड आणि कठोर कारवाई केली जाऊ शकते.

या प्रकरणात ‘CURE SMA फाउंडेशन ऑफ इंडिया’ या संस्थेने कोर्टात अर्ज दाखल केला होता. ही संस्था दुर्मिळ आजार असलेल्या दिव्यांग मुलांसाठी कार्य करते. संस्थेने मांडले की अशा प्रकारचे कंटेंट दिव्यांगांचा अपमान करतात आणि समाजात चुकीचा संदेश पसरवतात.

सुनावणीदरम्यान न्यायमूर्ती सूर्यकांत यांच्या एकलपीठाने केंद्र सरकारलाही धारेवर धरले आणि स्पष्ट केले की अशा घटनांवर आळा घालण्यासाठी ठोस मार्गदर्शक तत्त्वे तातडीने आणली पाहिजेत. दिव्यांग, महिला, मुले आणि वरिष्ठ नागरिकांवर आधारित अपमानास्पद कंटेन्टला आळा घालण्याची जबाबदारी सरकारवर टाकण्यात आली आहे.

न्यायमूर्ती सूर्यकांत यांच्या एकलपीठाने सुनावणीत म्हटले, “आज दिव्यांगांवर थट्टा होते, उद्या इतरांवर होईल. या स्वातंत्र्याला मर्यादा असल्या पाहिजेत.” कोर्टाचा हा कठोर सूर पाहता, सोशल मीडिया इन्फ्लुएंसर्सना आता पुढील काळात त्यांच्या भाष्याबाबत अधिक जबाबदारीने वागावे लागणार आहे.