Koffee With Karan 7 : सुहाना खान आणि खुशी कपूर 'कॉफी विथ करण' मध्ये करणार एन्ट्री

मुंबई : बॉलिवूडचा प्रसिद्ध दिग्दर्शक आणि निर्माता करण जोहरच्या(Karan Johar) चॅट शो 'कॉफी विथ करण-७' प्रसारित झाल्यापासून या शोची सर्वत्र चर्चा सुरू आहे. या शोबाबत रोज काही ना काही रंजक वृत्त समोर येतच असते. आता देखील अशीच एक बातमी समोर आली आहे. माहितीनुसार, शाहरुख खान आणि गौरी खानची मुलगी सुहाना खान(Suhana Khan) आणि बोनी कपूर-श्रीदेवी यांची मुलगी खुशी कपूर(Khushi Kapoor) या चॅट शोच्या आगामी एपिसोडमध्ये दिसणार आहेत. 'आर्चीज गँग' या झोया अख्तर दिग्दर्शित सिनेमाच्या प्रोमोशन निमित्ताने या दोघी या चॅट शोमध्ये सहभागी होणार आहेत.

'कॉफी विथ करण-७' या शोबाबत प्रेक्षकांमध्ये एक वेगळीच क्रेझ पाहायला मिळत आहे. आत्तापर्यंत अनेक बॉलिवूड स्टार्स या शोचा भाग बनले असले तरी विशेष म्हणजे यावेळी साऊथचे सुपरस्टार्सही या शोमध्ये उत्साहाने सहभागी होत आहेत. शोच्या शेवटच्या एपिसोडमध्ये साऊथची प्रसिद्ध अभिनेत्री समंथा रुथ प्रभू अभिनेता अक्षय कुमारसोबत या शोमध्ये सहभागी झाली होती. आता आगामी एपिसोड्समध्ये अनन्या पांडेसोबत साऊथचा प्रसिद्ध अभिनेता विजय देवरकोंडा दिसणार आहे. यावेळी समंथा- विजय देवरकोंडा यांनी वेगवेगळ्या एपिसोड्सद्वारे या शोमध्ये पदार्पण केले आहे.

माहितीनुसार, सुहाना खान कॉफी विथ करणच्या सातव्या सीझनमधून बॉलिवूडमध्ये पदार्पण करणार आहे. ती खुशी कपूरसोबत या शोमध्ये दिसणार असल्याचे सांगण्यात येत आहे. 'आर्चीज गँग' या सिनेमामध्ये सुहाना खान आणि खुशी कपूर एकत्र डेब्यू करणार आहेत. या शोमध्ये दोघेही त्यांचा बॉलिवूड प्रवासाला सुरुवात करणार असून या शोमध्ये 'द आर्चीज' सिनेमाच्या शूटिंगचे अनुभव आणि किस्से सांगणार आहेत.

सुहाना आणि खुशीच्या 'कॉफी विथ करण'मधील एंट्रीबाबत शोच्या निर्मात्यांकडून किंवा या दोन्ही स्टार्सकडून अजूनही कोणतीही अधिकृत माहिती समोर आलेली नाही. पण या बातमीमुळे सुहाना आणि खुशीचे चाहते खूप उत्सुक झाले आहेत.