Famous Actor Death : प्रसिद्ध अभिनेत्याचे निधन, मनोरंजन विश्वावर शोककळा

मनोरंजन विश्वातून धक्कादायक बातमी समोर आली आहे. प्रसिद्ध अभिनेत्याचे निधन झाले आहे. दक्षिण कोरियाई अभिनेता ली सांग-बो (Lee Sang Bo) यांच्या निधनाने सिनेसृष्टीत शोककळा पसरली आहे. वयाच्या ४४ व्या वर्षी अभिनेत्याने अखेरचा श्वास घेतला आहे. अभिनेत्याचे नाव यापूर्वी अंमली पदार्थांच्या सेवनाबाबतच्या खोट्या आरोपांमध्ये गोवले गेले होते. तथापि, त्यांच्या मृत्यूचे नेमके कारण अद्याप स्पष्ट झालेले नाही. सध्या पोलीस या प्रकरणाचा तपास करत आहेत.

TOI ने 'सोल इकॉनॉमिक डेली'च्या (Seoul Economic Daily) दिलेल्या वृत्तानुसार, गुरुवारी ली सांग-बो यांचा मृतदेह त्यांच्या कुटुंबातील एका सदस्याला आढळून आला. पोलीस अधिकारी अभिनेत्याच्या मृत्यूशी संबंधित परिस्थितीचा आणि कारणांचा शोध घेत आहेत. शुक्रवार, २७ मार्च रोजी, दिवंगत अभिनेत्याच्या एजन्सीने (व्यवस्थापन संस्थेने) निवेदन दिले की, अभिनेत्याच्या आकस्मिक निधनाबाबतचे तपशील निश्चित करण्याचे काम सध्या सुरू आहे. अभिनेत्याचा अंत्यविधी येत्या काही दिवसांत पार पडण्याची शक्यता आहे.

कोण आहे ली सांग-बो?

१९८१ मध्ये जन्मलेले ली सांग-बो यांनी २००६ मध्ये 'इनव्हिजिबल मॅन चोई जांग-सू' या ड्रामाद्वारे आपल्या अभिनय कारकिर्दीची सुरुवात केली. त्यानंतर त्यांनी 'बॅड लव्ह', 'प्रायव्हेट लाइव्हज', 'मिस मोंटे-ख्रिस्टो', 'ग्रेसफुल एम्पायर' आणि 'गोल्डन एरा ऑफ डॉटर्स-इन-लॉ' यांसारख्या अनेक कलाकृतींमध्ये काम केले.

२०२२ मध्ये, ली सांग-बो यांच्यावर अंमली पदार्थांचे सेवन केल्याचा आरोप करण्यात आला होता. तथापि, हे आरोप नंतर खोटे असल्याचे सिद्ध झाले; कारण, अल्पावधीतच आपली बहीण आणि आई-वडिलांना गमावल्यामुळे आलेल्या नैराश्यावर मात करण्यासाठी डॉक्टरांनी लिहून दिलेली नैराश्यविरोधी औषधे (antidepressants) ते घेत होते आणि त्यातूनच हे आरोप निर्माण झाले होते.त्या वेळी, पोलिसांनी तपासाअंती असा निष्कर्ष काढला की, त्यांच्याविरुद्ध खटला चालवण्यासाठी पुरेसे पुरावे उपलब्ध नाहीत. त्यामुळे, कोणतेही आरोप दाखल न करता पोलिसांनी हे प्रकरण बंद करण्याचा निर्णय घेतला.

ली सांग-बो यांनी एका वर्षाने, 'KBS' वाहिनीवरील 'द एलिगंट एम्पायर' या ड्रामाद्वारे त्यांनी पुन्हा अभिनयाच्या क्षेत्रात पुन्हा एन्ट्री घेतली. अभिनेता सोशल मीडियावर खूप सक्रिय होता. ली सांग-बो यांच्या निधनानंतर कलाकार मंडळींनी त्यांना श्रद्धांजली वाहिली आहे.