Salman Khan: सलमान खानच्या फार्महाऊसची रेकी करणाऱ्या आरोपींना दिलासा! न्यायालयाकडून जामीन मंजूर

Salman Khan: गेल्या वर्षी एप्रिलमध्ये सलमान खानच्या गॅलेक्सी अपार्टमेंटमधील घरावर गोळीबार झाला होता. काही काळानंतर, पोलिसांनी त्याच्या पनवेल फार्महाऊसची रेकी केल्याच्या आरोपाखाली दोन लोकांना अटक केली. ते दोघेही त्या व्हॉट्सअॅप ग्रुपचा भाग होते ज्यामध्ये सलमानला मारण्याचा कट रचला जात होता. या दोन्ही आरोपींना मुंबई उच्च न्यायालयाने जामीन मंजूर केला आहे.

वृत्तसंस्था पीटीआयनुसार, शुक्रवारी मुंबई उच्च न्यायालयाने दोघांनाही जामीन मंजूर केला. गौरव भाटिया उर्फ ​​संदीप बिश्नोई आणि वास्पी महमूद खान अशी दोन्ही आरोपींची नावे आहेत. दोघांविरुद्ध कोणतेही ठोस पुरावे सापडले नाहीत म्हणून या आरोपींचा जामीन मंजूर करण्यात आला.

१८ जणांविरुद्ध गुन्हा दाखल

गेल्या वर्षी, नवी मुंबई पोलिसांनी दावा केला होता की या दोघांनी इतर काही आरोपींसह सलमान खानच्या फार्महाऊसची आणि तो शूटिंगसाठी जातो त्या ठिकाणांची रेकी केली होती. तसेच, सलमान खानच्या हत्येचा कट रचल्याबद्दल बिश्नोई टोळीतील १८ जणांविरुद्ध गुन्हा दाखल करण्यात आला.

लॉरेन्स बिश्नोईने अनेक वेळा धमकी दिली आहे

अहमदाबादच्या तुरुंगात असलेला लॉरेन्स बिश्नोई बऱ्याच काळापासून सलमान खानच्या मागे लागला आहे. त्याने सलमानला अनेक वेळा जीवे मारण्याची धमकी दिली आहे. गेल्या वर्षी सलमानच्या घरी झालेल्या गोळीबारानंतर त्याची सुरक्षा वाढवण्यात आली आहे. सलमानच्या घरापासून ते शूटिंग सेटपर्यंत कडक सुरक्षा व्यवस्था करण्यात आली आहे.

सलमानच्या व्यावसायिक आयुष्यावर नजर टाकली तर तो बऱ्याच काळापासून त्याच्या आगामी 'सिकंदर' चित्रपटावर काम करत आहे. २०२३ मध्ये प्रदर्शित झालेल्या 'टायगर ३' नंतर सलमानचा एकही चित्रपट प्रदर्शित झालेला नाही. पण लवकरच त्याच्या 'सिकंदर' चित्रपट प्रेक्षकांच्या भेटीला येणार आहे. त्याचा हा चित्रपट यावर्षी ईदच्या मुहूर्तावर प्रदर्शित होणार आहे.